Astanada «Qazaq handyǵy. Altyn taq» filminiń tusaýkeseri ótti, dep habarlaidy "Ult aqparat" «Qazaqfilm» kinostýdiiasynyń resmi saityna silteme jasap.
«Altyn taq» tarihi týyndysy - «Qazaq handyǵy» kinoserialynyń ekinshi maýsymy. Onyń alǵashqy kórermenderi elimizdiń barlyq aimaqtarynan «Nur Otan» partiiasynyń mereitoilyq sezine kelgen delegattar boldy. Tusaýkeser elordadaǵy «Qazaqstan» ortalyq kontsert zalynda ótti.
Tarihi týyndynyń avtory - QR Prezidenti Nursultan Nazarbaev.
Tusaýkeser barysynda kinotýyndyǵa qatysqan shyǵarmashylyq quram men akterler qyzyl kilemmen júrip ótti.
«Qazaq handyǵy» kinojobasy Elbasynyń bastamasy boiynsha qolǵa alyndy jáne halyqtyń rýhani jańǵyrýyna baǵyttalǵan. Qazaqstan Respýblikasynyń Prezidenti Nursultan Nazarbaev jańa turpatty jańǵyrýdyń eń basty sharty ulttyq mádenietti, ulttyq kodty saqtai bilý ekendigin aitty. Olar saqtalmasa, eshqandai jańǵyrý bolmaityndyǵyn atap ótken bolatyn. Filmde tarih qana emes, kóshpendi halyqtyń bai mádenieti, onyń tynys-tirshiligi beinelengen. Sonymen qatar, Elbasynyń «Uly dalanyń jeti qyry» maqalasynda kóterilgen máseleler filmde kórinis tapty», - dedi Mádeniet jáne sport ministri Arystanbek Muhamediuly.
Film prokatqa biylǵy naýryz aiynda shyǵady.
Kóp seriialy kartinany QR Mádeniet jáne sport ministrliginiń tapsyrysy boiynsha «Centaurus Rustem Abdrashev production» JShS-niń qatysýymen Sh.Aimanov atyndaǵy «Qazaqfilm» kinostýdiiasy túsirdi.
Ekinshi maýsymnyń oqiǵa jelisi Jánibek pen Kerei handardyń Ábilqaiyr Shaibani urpaqtarymen Qazaq handyǵynyń Syǵanaqtaǵy taǵy úshin talasy ainalasynda órbidi. Bul qazaq handyǵyndaǵy eń kúrdeli kezeńderiniń biri.
Filmniń rejisseri - Qazaqstan Respýblikasynyń Eńbek sińirgen qairatkeri, kinorejisser, stsenarist jáne sýretshi Rústem Ábdirash. Ol «Quraq kórpe», «Qaladan kelgen qyz», «Stalinge syilyq», Elbasy joly kinoepopeiasynyń: «Balalyq shaǵymnyń aspany», «Ot-ózen», «Temirtaý», «Tyǵyryqtan jol tapqan» jáne «Qazaq handyǵy. Almas qylysh» atty kinotýyndylardyń avtory.
«Qazaq handyǵy» serialynyń birinshi maýsymy otandastarymyzdyń tarihqa degen qyzyǵýshylyǵyn oiatty. Shyǵarmashylyq toptyń atyna kóptegen alǵys hattar kelip tústi, ǵalamtor jáne áleýmettik jeliler arqyly jyly lebizder aldyq. Kóptegen pikirtalastar men syndar da boldy. Halyq tarapynan osy jobanyń jalǵasyn túsirse eken degen tilegin ańǵardyq. Bul biz úshin óte mańyzdy», - dep atap ótti filmniń rejisseri Rústem Ábdirash.
10 seriiadan turatyn tarihi serialdyń ekinshi maýsymynyń stsenariiin jazýǵa birinshi maýsymnyń avtorlary Timýr Jaqsylyqov, Smaǵul Elýbai, Rústem Ábdirash qatysty.
Tarihi kinonyń túsirilimderi Almaty oblysynda mamyrdyń basynda bastalǵan edi. Keiinirek túsirilim toby Túrkistan oblysynda ornalasqan «Eltai» aýyly mańyndaǵy «Iir sý» jailaýyna aýysty. Túsirilim toby rejisser Rústem Ábdirashtiń bastaýymen Kerei men Jánibek handardyń turaǵyn - tórelerdiń aýylyn jasap shyqty. Shaibanilar men Qazaq handyǵynyń úlken urys sahnasy da jailaýda túsirilgen.
Sonymen qatar, túsirilimder Qazaqstannyń tarihi qalalary - Taraz jáne Túrkistanda ótti.
«Ekinshi maýsymnyń aty aityp turǵandai «Qazaq handyǵy. Altyn taq». Qazaq handyǵyndaǵy eń bir kúrdeli kezeńderdiń biri. Jánibek pen Kereidiń Ábilqaiyr Shaibani urpaqtarymen Qazaq handyǵynyń Syǵanaqtaǵy taǵy úshin taq talasy. Bul maýsymda taqty, Aqordanyń astanasy Syǵanaqty qaitarý syndy mańyzdy oqiǵalardyń ainalasynda órbidi. Birinshi maýsymmen salystyrǵanda bul, árine, áldeqaida qyzyǵyraq, dinamikasy jaǵynan jyldam. Ekshn kóp bolady. Kórermenge qyzyqty bolady degen oidamyn», - dedi filmniń bas prodiýseri Arman Ásenov.
Esterińizge sala keteiik, Qazaq handyǵynyń qurylǵanyna 550 jyl tolýyna bailanysty jasalǵan serialdyń birinshi maýsymynyń televiziialyq tusaýkeseri 2017 jyldyń naýryzynda ótken bolatyn. Sondai-aq, sol jyly qańtar aiynda «Almas qylysh» atty kinonusqasy jalpyulttyq prokatqa shyqty.
