Foto: 7kun.kz
Astanada «Zań men tártip» qaǵidatyn iske asyrý aiasynda nashaqorlyq pen esirtki biznesine qarsy is-qimyl máseleleri boiynsha vedomstvoaralyq shtab otyrysy ótti. Jiynǵa qala ákiminiń orynbasary Erik Meiirhan tóraǵalyq etti, dep habarlaidy Ult.kz Kazinform-ǵa silteme jasap.
Kezdesýde jyldyń birinshi toqsanyndaǵy jumys qorytyndylary qaralyp, aldaǵy kezeńge arnalǵan mindetter aiqyndaldy. Negizgi nazar atqarýshylyq tártipti kúsheitý men onlain esirtki saýdasyn toqtatýǵa aýdaryldy.
Mamandardyń aitýynsha, qazirgi tańda esirtki qylmysynyń basym bóligi internet arqyly júzege asady. Osyǵan bailanysty onlain-arnalardy buǵattaý basty basymdyqqa ainalǵan.
Astana qalasy Politsiia departamentiniń málimetinshe, 562 esirtki saity buǵattaýǵa jiberilgen, 378 kúmándi bank kartasynyń jumysy toqtatylǵan. Sondai-aq 369 quqyq buzýshylyq anyqtalyp, onyń 125-i esirtki satý faktisi retinde tirkelgen.
Zańsyz ainalymnan 45 keliden astam esirtki tárkilendi, onyń ishinde 15 kelige jýyq sintetikalyq zattar bar. Budan bólek, esirtkini jarnamalaýǵa qatysty 4 qylmystyq is qozǵalyp, 75-ten astam esirtki graffitii joiyldy.
Sondai-aq «kúldirgish gazdy» zańsyz qoldanýǵa bailanysty 20 qylmystyq is tirkelip, 70-ten astam ballon tárkilendi.
Shtab otyrysynda jastar arasynda profilaktikalyq jumysty kúsheitý qajettigi erekshe atap ótildi. Ásirese jazǵy demalys kezeńinde sporttyq jáne kibersporttyq is-sharalar arqyly keń aýqymdy aqparattyq aktsiialar ótkizilmek.
Sonymen qatar esirtkige qarsy kúreste IT-tehnologiialardy damytý, kúmándi áreketterdi anyqtaý júielerin jetildirý usynyldy. Qoǵamdyq kólik júrgizýshilerin júieli tekserý jáne jastardy eńbek pen qoǵamdyq jumystarǵa tartý máseleleri de qaraldy.
Aita keteiik, buǵan deiin Pavlodarda iri esirtki arnasy joiylǵan bolatyn.
