Astanadaǵy Kinopark 8 Imax Saryarka kinoteatrynda erteń, iaǵni 12 aqpan kúni («Saryarqa» SO) Kann kinofestivali men «Nika» syilyǵynyń laýreaty Sergei Dvortsevoidyń «Aika» kórkem filminiń tusaýkeseri ótedi, dep habarlaidy "Ult aqparat" QR Mádeniet jáne sport ministrliginiń baspasóz qyzmetine silteme jasap.
Aita ketsek, film Qazaqstan Respýblikasy atynan amerikandyq kinoakademiiasynyń «Oskar» syilyǵyna usynylǵan bolatyn.
Filmde basty róldi Halyqaralyq Kann-2018 kinofestivalinde «Úzdik áiel róli úshin» júldesine ie bolǵan qazaqstandyq aktrisa Samal Esliamova somdaidy. Film saǵat 18.30 ýaqytynda kórsetiledi.
Samal Esliamovanyń osy týyndynyń arqasynda Kann festivaliniń jeńimpazy atanǵany belgili. Aktrisanyń aitýynsha, filmniń eń sońǵy epizody ony qatty tebirentken.
«Men - qazaq qyzymyn. Ózim de ashyq-shashyq kinolardy jaqtyrmaimyn. Sebebi bizdiń boiymyzda ar-uiat degen sezim bar. Endi, kinoda keiipkerdiń obrazyn shynaiy oinaǵanda kerek kadrlar bolady. Ony da túsiný kerek. Degenmen, shekten shyqpaý qajet. Ártis osyny jaqsy túsinýi kerek dep oilaimyn. Bul filmde ondai kadrlar joq. Sondyqtan «Aika» úshin uialmaisyzdar», - degen edi byltyr Samal Esliamova jýrnalisterge bergen suxbatynda.
