Biyl Nur-Sultan qalasynda ambýlatoriialyq-emhanalyq deńgeidegi meditsinalyq qyzmetterdiń qoljetimdiligi keńeie túsedi. Bul týraly Áleýmettik-meditsinalyq saqtandyrý qory Nur-Sultan qalasy boiynsha filialynyń direktory Nurlybek Qabdyqaparov málim etti, dep habarlaidy QazAqparat.
«Bizdiń 2021 jylǵa arnalǵan satyp alý týraly josparǵa sáikes halyqqa meditsinalyq kómek kórsetý úshin 26,55 mlrd teńge, onyń ishinde tegin kepildendirilgen meditsinalyq kómek kólemi (TMKKK) aiasynda – 24,15 mlrd teńge, al meditsinalyq saqtandyrý (MÁMS) paketindegi meditsinalyq qyzmetterge – 2,4 mlrd teńge qarastyrylǵan», - dedi Nurlybek Qabdyqaparov ZOOM platformasynda ótken baspasóz máslihatynda.
Onyń aitýynsha, búginde elordada meditsinalyq qyzmettiń 66%-yn jekemenshik mekemeler kórsetedi.
«Qazirgi ýaqytta Nur-Sultan qalasynda 108 meditsinalyq qyzmet kórsetýshi mekememen shart jasaldy, onyń 71-i – jekemenshik klinika. Jyl ótken saiyn halyqqa meditsinalyq qyzmet kórsetetin jekemenshik qyzmet jetkizýshiler úlesi artýda. Bul patsienttiń úzdik klinikany tańdaýyna múmkindik beredi. Meditsinalyq qyzmet jetkizýshiler tizimin bizdiń qordyń fms.kz saitynan qaraýǵa bolady. Biyl qor ambýlatoriialyq-emhanalyq deńgeidegi meditsinalyq qyzmetterdiń qoljetimdiligin keńeitedi. Atap aitqanda, statsionardy almastyratyn kómekti, kúndizgi statsionar qyzmetin, qashyqtyqtan kórsetiletin meditsinalyq kómekti, profilaktikalyq tekserýlerdi, bala densaýlyǵyn qorǵaý, mektep meditsinasy jáne onkogematologiia boiynsha qarjylandyrý kólemi artady», - deidi ol.
