Maýsymnyń sońynda kanadalyq Premier Tech kompaniiasy Astana - Premier Tech birlesken menshik iesi jáne demeýshi qyzmetinen ketedi. Osylaisha velokomandamen bes jyldyq seriktestik toqtaidy, - dep habarlaidy "Ult aqparat" Vesti.kz saityna silteme jasap.
"2017 jyly seriktestigimiz bastalǵanda Premier Tech qoldaýyna ie bolǵanymyzǵa qýanyshtymyz. Ol komanda úshin óte mańyzdy ról atqardy jáne biz kompaniianyń sońǵy jyldardaǵy eń mańyzdy sátterde, sonyń ishinde monýmentaldy klassikalyq jarystar men Týr de Frans kezeńindegi jeńisterde birge bolǵanyn maqtan tutamyz. Premier Tech kompaniiasy men qazaqstandyq aktsionerler arasynda birlesken menshik ieleri retinde uzaq merzimdi yntymaqtastyqta bolǵanymyzǵa qaramastan, ókinishke qarai, komanda bolashaǵynyń ortaq paiymyn anyqtaý múmkin bolmady.
Osyǵan bailanysty Premier Tech jyldyń sońynda komandaǵa investitsiia salýyn toqtatady. Men Jan Belanjerge jáne búkil Premier Tech kompaniiasyna komandamen yntymaqtastyqta kórsetken qoldaýy men yntasy úshin, sondai-aq COVID-19 pandemiiasynyń sońǵy eki maýsymynda barlyq mindettemeni sózsiz oryndaǵany úshin alǵys aitamyn. Biz osy maýsymdy birlesip tabysty aiaqtap, qalǵan jarystarda úzdik nátijelerge qol jetkizemiz dep úmittenemiz", - dep málimdedi Astana - Premier Tech basqarýshy direktory Iana Zel.
Onyń aitýynsha, qazirgi ýaqytta komanda kelesi maýsymdy josparlap otyr.
Óz kezeginde, Premier Tech prezidenti jáne bas direktory Jan Belanjer "Qazaqstanmen yntymaqtastyqty toqtatý Premier Tech úshin ókinishti bolsa da, 2017 jyldan beri bul jobaǵa qatysý tańǵajaiyp bolǵanyn" aitty.
"Biz maýsymnyń basynda Astana - Premier Tech-tiń birlesken menshik iesi jáne júzden asa demeýshisiniń biri retinde qatysýǵa jáne qazaqstandyq aktsionerlermen birge komanda úshin jańa baǵyttar qalyptastyrýǵa qýanyshtymyz. Ókinishke qarai, qazirgi talqylaýlarymyz ben bolashaqty josparlaý barysynda birdei kózqarasta emes ekenimiz anyq boldy, sondyqtan biz eki tarapty da qanaǵattandyratyn kelisimge kele almadyq", - dep qosty ol.
Aita keteiik, maýsymnyń sońynda Aleksandr Vinokýrov Astana-Premier Tech velokomandasynyń bas menedjeri qyzmetinen bosatyldy.
Keiinirek Vinokýrovtyń ózi bul oqiǵaǵa pikir bildirip, ony qyzmetinen bosatý týraly sheshim tańǵaldyrǵanyn aitty, ásirese Týr de Frans qarsańynda.
