Astana meditsina ýniversitetiniń jalǵan IELTS sertifikaty úshin oqýdan shyǵarylǵan bilim alýshylary qaitadan magistratýra men doktorantýraǵa túse alady. Bul týraly búgin BAQ ókilderine arnalǵan baspasóz máslihatynda atalǵan ýnversitettiń rektory Májit Shaidarov aitty, dep habarlaidy QazAqparat tilshisi.
Onyń atap ótýinshe, jalǵan sertifikattardy qabyldap alǵan komissiia múshelerine qatysty naqty sharalar qabyldanǵan.
«Qujattardy qabyldap alǵan adamdarǵa qatysty qoldanǵan sharalar jaiynda aitar bolsam, dekanmen birden kelisimshartty buzdyq. Dekan orynbasar men bas maman óz erikterimen jumystan ketti. Al oqýdan shyǵarylǵandar qalai desek te diplomy bar dárigerler. Sondyqtan olardyń magistratýraǵa, rezidentýraǵa qaita túsýge quqylary bar. Biraq, tek aqyly negizde ǵana. Olardyń tizimin jariialap qana qoimai, basqa da ýniversitetterge jiberemiz. Óitkeni, endigi ýaqytta tegin bilim ala almaidy», - dedi ýniversitet basshysy.
Ýniversitet rektorynyń sózine qaraǵanda, qazirgi ýaqytta magistratýra, rezidentýra jáne doktorantýrada aqyly negizde bilim alýshylar oqýdan shyǵarylǵandardyń ornyna grantqa qabyldaý týraly ótinish jasaǵan. Biraq bul máseleni elimzdiń Bilim jáne ǵylym ministrligi sheshetin bolady.
Aita keteiik, baspasóz máslihaty barysynda Májit Shaidarov jalǵan sertifikatpen magistratýra, rezidentýra jáne doktorantýraǵa túskenderdiń tizimi jariialanatyndyǵyn aitqan edi.
Al atalǵan bilim ordasynyń Joǵary oqý ornynan keiingi bilim fakýltetiniń dekany Ernar Tursynbettiń dereginshe, magistratýra men rezidentýra boiynsha ai saiyn 61 561 teńge shákirtaqy tólense, doktorantýrada oqityn bilim alýshylar 81 998 teńge shákirtaqy alǵan. Munan bólek, ai saiyn oqýǵa magistratýrada 61 myń teńge, rezidentýrada 67 myń teńge jáne doktorantýrada 120 myń teńge jumsalǵan.
