© Photo: Astana TJD
Astana áýejaiy mańynda qurǵaq shóp janyp jatyr. Órt aýmaǵy birneshe saǵattyń ishinde 3 gektarǵa deiin jetken, dep habarlaidy Sputnik Qazaqstan.
Qalalyq TJD baspasóz qyzmetiniń aqparatynsha, beisenbi saǵat 12:28-de órt sóndirý bólimsheleri halyqaralyq áýejai jaqqa qarai attanǵan. Aldyn ala málimet boiynsha 1 gektar aýmaqta qurǵaq shóp pen qamys janyp jatqan. Oqiǵa ornynda jedel shtab quryldy.
Qazirgi tańda órtti Astana TJD jeke quramynyń 40 adamy jáne 5 tehnika, qala ákimdiginiń 4 sý shashatyn mashinasy sóndirip jatyr.
Qaza bolǵandar men zardap shekkender joq. Órttiń sebebi anyqtalady.
Shóptiń qurǵaq bolýyna jáne jel soǵýyna bailanysty órttiń jyldam taralýy sóndirý jumystaryn qiyndatyp tur.
Áleýmettik jelide taraǵan videodan órttiń áýejaidyń ushý-qoný jolaǵyna jaqyndap qalǵanyn kórýge bolady.
Nursultan Nazarbaev halyqaralyq áýejaiynyń málimetinshe, órt áýe ailaǵynyń qyzmetine áser etpegen. Astana áýejaiy shtattyq rejimde jumys istep tur.
