Aqmola oblysynda Astana–Qorǵaljyn tas jolynda úsh kólik soqtyǵysyp, bes adam kóz jumdy. Taǵy bes adam túrli jaraqatpen aýrýhanaǵa jetkizildi, dep habarlaidy ult.kz.
Jol apaty týraly aqparat Instagram jelisindegi 716.kz paraqshasynda jariialandy. Qaiǵyly oqiǵa 21 maýsym kúni bolǵan. Oblystyq politsiia departamentiniń málimetinshe, Kia, Toyota Fortuner jáne Toyota Land Cruiser kólikteri soqtyǵysqan. Soqqy saldarynan eki Toyota kóligi órtenip ketken.
Aldyn ala málimet boiynsha, jol apatynan bes adam qaza taýyp, taǵy bes adam zardap shekken. Qazirgi ýaqytta sotqa deiingi tergep-tekserý bastalyp, oqiǵanyń barlyq mán-jaiy anyqtalyp jatyr.
