Siriia boiynsha Astana protsesiniń 15-raýndy 2020 jyldyń naýryzynda ótedi. Bul jaiynda Astana protsesiniń kepilger elderi Iran, Resei jáne Túrkiianyń birlesken málimdemesinde aitylǵan, dep habarlaidy QazAqparat.
Búgin elordada ótken 14-raýnd qorytyndysyna orai atalǵan birlesken málimdemeni jariia etken QR Syrtqy ister ministriniń birinshi orynbasary Shahrat Nuryshevtiń aitýynsha, qujatta Iordaniia, Irak jáne Livan delegatsiialarynyń Astana formatyna baiqaýshy el retinde syndarly qatysýyna rizashylyq tanytylǵan. Sonymen qatar bul elderdiń Siriiadaǵy beibitshilik pen turaqtylyqty qalpyna keltirý isindegi mańyzdy róli atalyp ótilgen.
«Qazaqstan biligine Astana formatyndaǵy Siriia boiynsha 14 halyqaralyq kezdesýdi Nur-Sultanda ótkizgeni úshin shynaiy rizashylyqtaryn bildirdi. Astana formatyndaǵy Siriia boiynsha kelesi halyqaralyq kezdesýdi 2020 jyldyń naýryzynda Nur-Sultanda ótkizý týraly sheshim qabyldady», - dedi ol.
Sondai-aq birlesken málimdemede Astana formatyndaǵy beiindi jumys tobynyń aiasynda zorlyqpen ustalynyp otyrǵan tulǵalardy, kepilge alynǵan adamdardy bosatý operatsiialaryn jalǵastyrý qajettigi aitylǵan. Siriianyń búkil aýmaǵynda barlyq siriialyqtarǵa gýmanitarlyq járdemdi arttyrý qajettigine nazar aýdarylǵan. Atap aitqanda, Siriiadaǵy gýmanitarlyq ahýaldy jaqsartýǵa qoldaý kórsetý maqsatynda halyqaralyq qoǵamdastyq, BUU jáne onyń gýmanitarlyq agenttikteri siriialyqtarǵa kómekti ulǵaitýǵa shaqyrylǵan.
