«Astana» komandasy Eýropa ligasy toptyq kezeńiniń 4-týry aiasynda óz alańynda Chehiianyń «Iablonets» komandasyn tize búktirdi, dep habarlaidy "Ult aqparat".
Elordalyq ujym óz jankúierleriniń aldynda birinshi nómirmen oinaýǵa tyrysty. 18-minýtta buryshtamadan keiin qolaily pozitsiiada turǵan 11-nómirdegi Pedro Enrike gol soǵyp, alań ielerin alǵa bastady.
Jiberilgen goldan keiingi qonaqtardyń oiynynda birshama jinaqylyq baiqaldy. Shabýyldary údei túsip, esepti teńestirdi. 41-minýtta buryshtamadan keiin dop elordalyqtardyń qorǵaýshysy Bahtiiar Zainýtdinovke tiip, qaqpaǵa kirdi. Avtogol Bahtiiarǵa jazyldy. Birinshi taimda basqa gol soǵylmady.
Ekinshi taimda da komandalar ózara teń kúres júrgizdi deýge bolady. 55-minýtta alań ieleri qorǵanysta óreskel qatege boi aldyryp, sonyń saldarynan Edýard Sobol gol soǵyp kete jazdady. Abyroi bolǵanda, onyń pármendi soqqysy qaqpa baǵanynyń tý syrtynan óte shyqty.
Astanalyqtar ekinshi taimda gol soǵatyndai naǵyz qaýipti shabýyldardy uiymdastyrýda asa qiyndyqqa tap bolyp júrdi. Oiyn sońyna taiaǵan tusta bapker G. Babaian shabýyl shebin kúsheitý úshin Roman Murtazaevty alańǵa shyǵardy. Bul óz nátijesin berdi: cheh komandasynyń qaqpasyna shyn máninde shtorm uiymdastyrǵan alań ieleri 88-minýtta esepti eseledi. Taǵy da buryshtamadan dop asyrylyp, Marin Tomasovtan dop alǵan Evgenii Postnikov gol soqty.
Osydan soń esepke ózgeris engen joq. «Astana» jeńiske jetti.
Endi elordalyq ujym 8 upaimen "K" tobynda kósh bastap tur.
«Astana»: Erich, Rýkavina, Anichich, Kliainhaisler, Pedro Enrike (Roman Murtazaev - 80'), Tomasov, Maevskii, Zainýtdinov, Richard Almeida (Serikjan Mýjikov - 71'), Kabananga (Rangelo Ianga - 62'), Postnikov;
«Iablonets»: Grýby, Govorka, Hiýbshman, Ganoýsek, Povajanets, Travnik, Lishka, Dolejal, Sobol (M. Kratovchil - 72'), Iovovich (V. Kýbista - 89'), Golesh.
Goldar: Pedro Enrike (18'), E. Postnikov (88') - B. Zainýtdinov (avt. - 41').
Sary qaǵazdar: Pedro Enrike (55'), M. Anichich (78'); V. Iovovich (28').
Tóreshi: Istvan Vlad, kómekshileri: Istvan Albert, Balaj Sert (Vengriia).
«Astana Arena» stadiony.
