«استانا» كومانداسى ەۋروپا ليگاسى توپتىق كەزەڭٸنٸڭ 4-تۋرى اياسىندا ٶز الاڭىندا چەحييانىڭ «يابلونەتس» كومانداسىن تٸزە بٷكتٸردٸ, دەپ حابارلايدى "ۇلت اقپارات".
ەلوردالىق ۇجىم ٶز جانكٷيەرلەرٸنٸڭ الدىندا بٸرٸنشٸ نٶمٸرمەن ويناۋعا تىرىستى. 18-مينۋتتا بۇرىشتامادان كەيٸن قولايلى پوزيتسييادا تۇرعان 11-نٶمٸردەگٸ پەدرو ەنريكە گول سوعىپ, الاڭ يەلەرٸن العا باستادى.
جٸبەرٸلگەن گولدان كەيٸنگٸ قوناقتاردىڭ ويىنىندا بٸرشاما جيناقىلىق بايقالدى. شابۋىلدارى ٷدەي تٷسٸپ, ەسەپتٸ تەڭەستٸردٸ. 41-مينۋتتا بۇرىشتامادان كەيٸن دوپ ەلوردالىقتاردىڭ قورعاۋشىسى باحتييار زاينۋتدينوۆكە تيٸپ, قاقپاعا كٸردٸ. اۆتوگول باحتييارعا جازىلدى. بٸرٸنشٸ تايمدا باسقا گول سوعىلمادى.
ەكٸنشٸ تايمدا دا كوماندالار ٶزارا تەڭ كٷرەس جٷرگٸزدٸ دەۋگە بولادى. 55-مينۋتتا الاڭ يەلەرٸ قورعانىستا ٶرەسكەل قاتەگە بوي الدىرىپ, سونىڭ سالدارىنان ەدۋارد سوبول گول سوعىپ كەتە جازدادى. ابىروي بولعاندا, ونىڭ پەرمەندٸ سوققىسى قاقپا باعانىنىڭ تۋ سىرتىنان ٶتە شىقتى.
استانالىقتار ەكٸنشٸ تايمدا گول سوعاتىنداي ناعىز قاۋٸپتٸ شابۋىلداردى ۇيىمداستىرۋدا اسا قيىندىققا تاپ بولىپ جٷردٸ. ويىن سوڭىنا تاياعان تۇستا باپكەر گ. بابايان شابۋىل شەبٸن كٷشەيتۋ ٷشٸن رومان مۇرتازاەۆتى الاڭعا شىعاردى. بۇل ٶز نەتيجەسٸن بەردٸ: چەح كومانداسىنىڭ قاقپاسىنا شىن مەنٸندە شتورم ۇيىمداستىرعان الاڭ يەلەرٸ 88-مينۋتتا ەسەپتٸ ەسەلەدٸ. تاعى دا بۇرىشتامادان دوپ اسىرىلىپ, مارين توماسوۆتان دوپ العان ەۆگەنيي پوستنيكوۆ گول سوقتى.
وسىدان سوڭ ەسەپكە ٶزگەرٸس ەنگەن جوق. «استانا» جەڭٸسكە جەتتٸ.
ەندٸ ەلوردالىق ۇجىم 8 ۇپايمەن "ك" توبىندا كٶش باستاپ تۇر.
«استانا»: ەريچ, رۋكاۆينا, انيچيچ, كلياينحايسلەر, پەدرو ەنريكە (رومان مۇرتازاەۆ - 80'), توماسوۆ, ماەۆسكيي, زاينۋتدينوۆ, ريچارد المەيدا (سەرٸكجان مۋجيكوۆ - 71'), كابانانگا (رانگەلو يانگا - 62'), پوستنيكوۆ;
«يابلونەتس»: گرۋبى, گوۆوركا, حيۋبشمان, گانوۋسەك, پوۆاجانەتس, تراۆنيك, ليشكا, دولەجال, سوبول (م. كراتوۆچيل - 72'), يوۆوۆيچ (ۆ. كۋبيستا - 89'), گولەش.
گولدار: پەدرو ەنريكە (18'), ە. پوستنيكوۆ (88') - ب. زاينۋتدينوۆ (اۆت. - 41').
سارى قاعازدار: پەدرو ەنريكە (55'), م. انيچيچ (78'); ۆ. يوۆوۆيچ (28').
تٶرەشٸ: يستۆان ۆلاد, كٶمەكشٸلەرٸ: يستۆان البەرت, بالاج سەرت (ۆەنگرييا).
«استانا ارەنا» ستاديونى.
