«Astana Opera» shyǵarmashylyq ujymy «Sankt-Peterbýrg Opera» memlekettik kameralyq mýzykalyq teatrda «Jibek saty» opera-farsyn sahnalaidy, dep habarlaidy "Ult aqparat".
20 qazan kúni «Sankt-Peterbýrg Opera» memlekettik teatrynda anshlag bolady. Sebebi qazaqstandyq ártisterdi asyǵa kútken peterborlyq kórermender qoiylymǵa barlyq biletterdi bir ai buryn satyp alǵan.
Gastrol «Rýhani jańǵyrý» baǵdarlamasy aiasynda QR Mádeniet jáne sport ministrliginiń qoldaýymen ótedi.
«Spektaklderdiń joǵary deńgeii men ártisterimizdiń asqan sheberliginiń arqasynda «Astana Opera» teatryn álemdik mádeni keńistikte jaqsy biledi jáne baǵalaidy. Jetinshi teatr maýsymynyń gastroldik kestesin ashatyn «Sankt-Peterbýrg Opera» sahnasyndaǵy qoiylym Reseidiń Halyq ártisi, QR Memlekettik syilyǵynyń laýreaty Iýrii Isaakovich Aleksandrovtyń shaqyrtýy arqasynda ótedi. Gastroldi ótkizý boiynsha barlyq shyǵyndardy Sankt-Peterbor teatry tolyǵymen óz moinyna aldy. Bizdiń trýppa men kórnekti reseilik rejisser arasyn tyǵyz kópjyldyq dostyq bailanystyratynyn atap ótken jón. Talǵampaz peterborlyq kórermen aldynda óner kórsetý biz úshin úlken qurmet ári jaýapkershilik, spektakl úlken jetistikpen ótetinine senim bildiremiz, - dedi «Astana Opera» teatrynyń direktory, Qazaqstannyń eńbek sińirgen qairatkeri Ǵalym Ahmediarov.
Djoakkino Rossini 20 jasynda venetsiialyq San-Moze teatryna arnap, Dj.M.Fopptyń librettosyna «Jibek saty» bir bólimdi kúldirgi opera-farsyn jazdy. Spektakl jarqyn ázil-syqaq pen oqiǵalar jelisindegi ártisterdiń jandy sýyryp-salma mánerimen, daryndy vokaldyq jáne aspaptyq partiialarymen erekshelenedi. Uly kompozitor óziniń tamsanysyn bir-birine ǵashyq jas jubailar Djýliia men Dorvildiń jalyny men tapqyrlyǵy arqyly bildiredi.
Basty partiialardy oryndaýǵa «Astana Opera» jetekshi solisteri, qazaqstandyq operalyq sahna juldyzdary daiyndalýda: Djýliia – Qazaqstannyń eńbek sińirgen ártisi Jannat Baqtai, Dorvil – Qazaqstannyń eńbek sińirgen qairatkeri Jan Tapin, Djermano – Qazaqstannyń eńbek sińirgen qairatkeri, QR Memlekettik syilyǵynyń laýreaty Súndet Baiǵojin. Spektaklge sondai-aq teatrdyń daryndy solisteri qatysady: Liýchilla – Saltanat Muratbekova, Blanzak – Evgenii Chainikov, Dormont – Ramzat Balakishiev.
«Astana Opera» Kameralyq orkestri spektakldiń qoiýshy dirijeri Qazaqstannyń eńbek sińirgen qairatkeri Abzal Muhitdinovtiń jetekshiligimen óner kórsetedi, klavesin partiiasynda – Elena Sahno, Janar Ahmetova. Qoiýshy rejisser – Alla Simonishvili, stsenograf jáne kostiýmder boiynsha sýretshi – Manana Gýnia. Jobanyń tehnikalyq direktory – Viktor Karare, qoiýshy dirijerdiń assistenti – Rýslan Baimýrzin, qoiýshy rejisserdiń assistenti – Erenbaq Toikenov. Kontsertmeisterler – Elena Sahno, Janar Ahmetova, Merýert Jekenova, qoiýshy rejisserdiń kómekshileri – Altynǵanym Ahmetova, Mánsiia Estekova. Joba úilestirýshisi– Marjan Jákenova.
Aita keteiik, 9 jáne 10 qarashada «Sankt-Peterbýrg Opera» memlekettik kameralyq mýzykalyq teatrdyń shyǵarmashylyq ujymy óz kezeginde Qazaqstannyń astanasyna gastrolmen keledi. Alǵash ret «Astana Opera» sahnasynda ártister álemdik opera óneriniń jaýharlary – Dj.Verdidiń «Rigoletto» jáne J.Bizeniń «Injý izdeýshiler» týyndylaryn usynady.
