Astana Opera teatrynda astana kúnin merekeleýge daiyndyq qarqyndy júrip jatyr, dep habarlaidy "Ult aqparat" teatrdyń baspasóz qyzmetine silteme jasap.
«Astana Opera» teatry elorda kúnine orai aýqymdy merekelik baǵdarlama ázirledi. Qala turǵyndaryna arnalǵan jarqyn syilardyń biri – álemniń 5 elinen kelgen ataqty ártisterdiń qatysýymen G.Donitsettidiń «Don Paskýale» operasynyń tegin kórsetilimi.
Solister «Astana Opera» teatrynyń sahnasynda ǵana emes, sondai-aq ashyq alańdardaǵy óner kórsetýge de belsendi daiyndalýda.
Astana kúnin merekeleý aiasynda 4 shilde saǵat 18:00-de teatrdyń Úlken zaly sahnasynda «Astana Opera» Halyqaralyq opera akademiiasynyń ashylýyna orai saltanatty Gala-opera ótedi. Kontsertke Mariandjela Sitsiliia, maestro Djýzeppe Akýaviva, Franchesko Meli, Mattia Rossi (Italiia), Libýshe Santorisova (Chehiia), Aleksei Shapovalov (Resei), Badral Chýýlýnbaatar (Mońǵoliia), Saian Isin (Qazaqstan-Qyrǵyzstan), Baýyrjan Ánderjanov (Germaniia-Qazaqstan), Medet Chotabaev, Jupar Ǵabdýllina, Saltanat Ahmetova (Qazaqstan) jáne basqa álemdik ári qazaqstandyq óner juldyzdary qatysady.
Ánshiler barsha qazaqstandyqtardy alda kele jatqan astana kúnimen quttyqtady.
- Osynaý aitýly ári jaýapty oqiǵaǵa qatysyp, úlesimdi qosýǵa shaqyrǵany úshin qýanyshtymyn, senim bildirgeni úshin teatr direktsiiasyna alǵys aitamyn. Týǵan jerińde otandastaryńnyń aldynda sán-saltanaty jarasqan «Astana Opera» zalynda án shyrqaý – árdaiym tebiretip, tolǵandyrary sózsiz. Áriptesterimmen birge asqaq ónerdiń naǵyz meiramyn jasaimyz degen senimdemin, - dep atap ótti tanymal tenor Saian Isin.
Oryndaýshylardyń juldyzdy quramy Ortalyq qalalyq saiabaqtaǵy Amfiteatr sahnasynda da óner kórsetedi.
«Astana Opera» teatry QR Mádeniet jáne sport ministrligi jáne Nur-Sultan qalasynyń ákimdigimen birlesip, 5 shilde saǵat 20:00-de Gaetano Donitsettidiń eki bólimdi «Don Paskýale» operasyn usynady.
Basty partiialardy oryndaýshylar: Norina – Libýshe Santorisova (Chehiia), Ernesto – Etsýo Doi (Japoniia), Malatesta – Aleksei Shapovalov (Resei), Don Paskýale – Antýan Bernheim (Shveitsariia), Karlito – Erulan Kámel. Dirijer – Korrado Valvo (Italiia).
- Bul meniń osyndai daryndy halyqaralyq ánshiler quramymen alǵashqy yntymaqtastyǵym. Ashyq aspan astynda óner kórsetý kezinde eń qiyny – ánshiler men orkestr arasyndaǵy teńgerimdi tabý. Óz basym operalyq spektaklder úshin italiialyq stildegi teatrdy qup kóremin, biraq jaz mezgilinde bizde Italiiada opera sahnasy retinde qoldanylatyn ejelgi grek jáne ejelgi rim teatrlary bar. «Don Paskýale» – G.Donitsettidiń keremet áýezdi konstrýktsiialarǵa, áserli dramatýrgiialyq qurylymǵa, keiipkerlerdiń psihologiialyq jáne patetikalyq tereńdigine ie pisip-jetilgen shyǵarmasy, bul – stilistikalyq tutastyqqa qurylǵan jańa romantikalyq sezimtaldyqtyń nátijesi, osynyń bári Donitsettidi Verdidiń uly izashary ári on toǵyzynshy ǵasyrdyń birinshi jartysyndaǵy uly italiialyq opera kompozitorlarynyń biri etedi, - dep atap ótti maestro Korrado Valvo (Italiia).
6 shildede Ortalyq qalalyq saiabaqtaǵy amfiteatr sahnasynda merekelik Gala-kontsert ótedi.
Onda «Astana Opera» teatrynyń jetekshi opera solisteri, hor ártisteri men simfoniialyq orkestriniń oryndaýynda qazaqstandyq avtorlar men batys eýropalyq klassik kompozitorlardyń tanymal operalyq ariialary men dýetteri, aspaptyq ári horǵa arnalǵan shyǵarmalary shyrqalady.
Merekelik 6 jáne 7 shilde kúnderi «Astana Opera» Úlken zalynyń sahnasynda afishaǵa eki birdei qoiylym – «Kúmis ǵasyr baletteri» toptamasynan M.Fokinniń horeografiiasyndaǵy F.Shopenniń mýzykasyna «Shopeniana» men N.A.Rimskii-Korsakovtyń mýzykasyna «Sheherazada» bir bólimdi baletteri engizildi.
