Nur-Sultanda eks-prorektor meditsina ýniversitetiniń rektory laýazymyn 47 myń dollarǵa satyp almaq bolǵan. Nur-Sultanda Baiqońyr aýdanynyń №2 soty úsh aiyptalýshyǵa qatysty úkim shyǵardy, - dep habarlaidy Tengrinews.kz.
Elordalyq sot ókilderi istiń mán-jaiyn aitty. Tergeý barysynda K-ǵa Astana meditsina ýniversitetiniń rektory mindetin atqarýshy D-nyń alaiaqtyq jolmen aqshasyn jymqyrdy degen aiyp taǵyldy.
"K-ǵa alaiaqtyq jolmen D-nyń 47 myń dollar kólemindegi qarajatyn jymqyrdy jáne D-ny Astana meditsina ýniversitetiniń rektory laýazymyna taǵaiyndalý úshin jaýapty memlekettik laýazymdy atqaratyn adamdarǵa para berýge itermeledi degen aiyp taǵyldy.
Para berýge árekettengeni úshin Astana meditsina ýniversiteti rektorynyń mindetin atqarýshy D., ony rektor laýazymyna taǵaiyndaý úshin 47 myń dollar kóleminde parany deldal K-ǵa jaýapty memlekettik laýazymdy atqaratyn adamdarǵa berý úshin aýdarǵan", - dedi elordalyq sot qyzmeti ókilderi.
Sonymen qatar, D-ǵa JShS basshysy G-dan da para aldy degen aiyp taǵyldy.
"D-ǵa JShS basshysy G-dan 10 myń dollar kóleminde para, 2 dana palto, Almaty qalasyna aviabilet pen 440 311 teńge kóleminde qonaqúide turý aqysyn tólegeni úshin, memlekettik satyp alý sharttaryn jasasyp, tólemdi jedeldetkeni jáne G-nyń kompaniiasyn 2022 jylǵy memlekettik satyp alý josparyna engizgeni úshin aiyp taǵyldy", - dedi elorda soty ókilderi.
G-ǵa Astana meditsina ýniversitetiniń prorektory D-ǵa para berdi degen aiyp taǵyldy.
Sot isti qarap, K-ǵa asa iri kólemde alaiaqtyq jáne jaýapty memlekettik laýazymdy atqaratyn adamdardy para alýǵa itermeleý deregi boiynsha sheshim shyǵardy. Qylmystyq jolmen qolma-qol aqsha túrindegi 980 myń teńge somasynda múlik tárkilenip, memlekettik qyzmette jáne kvazimemlekettik sektorda laýazymdy atqarý quqyǵynan ómir boiyna aiyryp, 7 jylǵa bas bostandyǵynan aiyrý jazasy taǵaiyndaldy.
G-ǵa memlekettik qyzmette jáne kvazimemlekettik sektorda laýazymdy atqarý quqyǵynan ómir boiyna aiyryp, 3 jylǵa bas bostandyǵynan aiyrý jazasy taǵaiyndaldy.
Úkim zańdy kúshine engen joq.
