Nur-Sultanda jyl saiynǵy Astana Media Week media-aptalyǵy bastaldy. Is-sharanyń negizgi maqsaty – otandyq mediaindýstriianyń negizgi jetistikteri men múmkindikterin kórsetý.
Úsh kúnge jalǵasatyn is-sharaǵa iri mediaholdingter men telearnalar, jeke prodakshn-stýdiialar, BAQ salasy ókilderi qatysyp jatyr. Onyń ishinde «Qazaqstan» RTRK» AQ, «Habar» Agenttigi» AQ, «Qazkontent» AQ, t.b. bar. Shet elden de arnaiy spikerler shaqyrylǵan.
Sharany QR Aqparat jáne qoǵamdyq damý ministri Dáýren Abaev ashty. Ministr Ortalyq Aziiada balamasy joq bul basqosýdyń otandyq media salasyn damytýǵa qosatyn úlesi joǵary bolatynyna senim bildirdi.
Media-aptalyq aiasynda master-klastar men treningter uiymdastyrylyp, otandyq mediaindýstriiany damytýdyń ózekti máseleleri talqylanady. Atap aitqanda, kontent sapasy, jańa aýditoriiany tartý, aimaqtyq BAQ jumysy jáne halyqaralyq tájiribelerge sholý sekildi taqyryptar qozǵalady.
Alǵashqy kúni «Baq.kz» aqparattyq agenttiginiń bas redaktory Erlan Ospan «Konveierdegi saýat» atty master-klass ótkizip, aqparattyq saýattylyqtyń mańyzdylyǵyn, onyń redaktsiia bedeline áseri jóninde aitty. Spiker tsifrlyq dáýirde aqparatty saýatty usyný kontent sapasyn jaqsartýdaǵy mańyzdy elementterdiń biri ekenin atap ótti.
Sondai-aq baǵdarlama aiasynda «Qazaqstan Tarihy» internet-jobasynyń bas redaktory Altynbek Qumyrzaq taqyryptyq saittarǵa aýditoriia qalyptastyrý jáne sapa kórsetkishin arttyrý taqyrybynda master-klass ótkizdi.
Tájiribeli jýrnalister óz jumystarynan mysal keltirip, qatysýshylarmen pikir almasty, kópshilik tolǵandyrǵan saýaldarǵa jaýap berdi.
Sonymen qatar aptalyq aiasynda ártúrli jańa jobalardyń tusaýy kesildi. Máselen, «Qazkontent» AQ Semei poligonynyń jabylýyna 30 jyl tolýyna orai interaktivti karta túrinde jasalǵan jańa jobasyn tanystyrdy. Sondai-aq kópshilik nazaryna Nur-Sultan qalasynyń kórnekti ornyndaryna, kósheler tarihy men mańyzdy nysandaryna arnalǵan taǵy bir joba usynyldy.
Aita ketsek, «Astana Media Week» media-aptalyǵy 11-13 qyrkúiek kúnderi aralyǵynda ótedi.
