Nur-Sultan qalasy Sáýlet, qala qurylysy jáne jer qatynastary basqarmasynyń basshysy Nurlan Uranqaev qurylys toqtap turǵan Astana LRT jobasy týraly aitty, dep habarlaidy QazAqparat.
«Astana LRT jobasynyń qurylysyna kelsek, ondaǵy tapsyrys berýshi - qalalyq sáýlet, qala qurylysy jáne jer qatynastary basqarmasy bolyp otyr. Astana LRT qurylysynyń ekinshi bóligi boiynsha ázirge tehnikalyq-ekonomikalyq negizdeme daiyndalyp jatyr. Bul negizdeme daiyn bolysymen, ári qarai ne bolatyny túsinikti bolady. Eger memlekettik saraptama bas tartpasa, iaǵni jobany jónsiz dep aitpasa, qurylysty jalǵastyramyz», - dedi basqarma basshysy Ortalyq kommýnikatsiialar qymetinde ótken baspasóz máslihatynda.
Onyń aitýynsha, zań boiynsha memlekettik saraptama 45 jumys kúninde jaýabyn berýi kerek.
Eske salsaq, Prezident LRT qurylysyn jedeldetýdi jáne oǵan qatysty isti tergeýdi tapsyrǵan bolatyn.
«Sybailas jemqorlyqqa qarsy is-qimyl agenttigine tergeýdi jedeldeý tapsyrmasymen júgingim keledi. Bireýlerdiń shetelge qashyp ketkenin aityp, «jeńildiń astymen, aýyrdyń ústimen» júrýge bolmaidy. Bul josparlanǵan qashý ekeni túsinikti. Ózgelerdi, onyń ishinde sheshim qabyldaǵan ákimdiktiń basshylaryn qaperden tys qaldyrmaý kerek», - dedi Memleket basshysy.
Buǵan deiin LRT qurylysy ýaqytsha toqtaǵanyn habarlaǵan bolatynbyz. Oǵan qatysty Úkimet basshysy Asqar Mamin pikir bildirdi.
