Sybailas jemqorlyqqa qarsy is-qimyl agenttigi «Astana LRT» isi boiynsha tergeýdiń tyń mán-jailary anyqtalǵanyn jariia etti, dep habarlaidy QazAqparat.
«Qurylystyń úsh kezeńin de tergep jatqan vedomstvoaralyq jedel tergeý toby quryldy. Tehnikalyq-ekonomikalyq negizdemesi men jobalyq-smetalyq qujattamanyń negizdiligi, oryndalǵan qurylys jumystarynyń negizgi bóligi, tehnikalyq baqylaý isiniń bári de tekserilip jatyr. Osyǵan bailanysty atalǵan salany arnaiy zerttei alatyn mamandar men sarapshylardy jumysqa tartyp jatyrmyz», - dedi elordada ótken búgingi brifingte agenttiktiń ekinshi departamentiniń basshysy Sergei Perov.
Onyń aitýynsha, iske qatysty barlyq qujattar qazirgi ýaqytta tárkilengen. Sol qujattarǵa orai ekonomikalyq jáne qurylys saraptamalary taǵaiyndalǵan.
«Qarjy mamandary ekonomikalyq esepti júrgizip jatyr, al qurylys sarapshylary salynyp qoiǵan nysandardyń baqylaýyn aiaqtady. Ulttyq bank pen Esep komitetiniń aralasýymen Qytaidyń damý bankinen «Astana Bankine» salynǵan qarajattyń negizdiligi men zańdylyǵy da tekserilýde. Sonymen birge, tergeý jymqyrýdyń jańa shemasyn anyqtap jatyr», - dedi ol.
Agenttik usynǵan aqparatqa súiensek, 2014 jyly «Astana LRT» JShS jobalyq-smetalyq qujattamalardy ázirleýde joǵarylatylǵan baǵamen kelisim jasaǵan.
«Memlekettik saraptamaǵa belgilengen 2,6 mlrd teńgeniń ornyna LRT-men 4,2 mlrd teńgeniń kelisimi jasalǵan. Ol qarajattyń 3 mlrd teńgesi merdigerlerge berilgen. Aiyrmashylyq 412 mln teńgeni kórsetken. Atalǵan soma qolma-qol aqshaǵa aýystyrylyp, jalǵan kásiporyndar arqyly jymqyrylǵan», - deidi ol.
Eske salsaq, Prezident LRT qurylysyn jedeldetýdi jáne oǵan qatysty isti tergeýdi tapsyrdy.
Buǵan deiin LRT-nyń qurylysy ýaqytsha toqtatylǵany týraly habarlaǵan bolatynbyz. Oǵan qatysty Úkimet basshysy Asqar Mamin pikir bildirdi.
