«Astana» klýbynyń direktory Mihail Gýrman QazSport telarnasyna bergen suhbatynda klýbtyń biýdjeti týraly aitty.
Áńgime barysynda Gýrman klýbtyń balansynda tek fýtbolshylar ǵana baryn jetkizdi.
«Men klýbqa kelmes buryn, «Astananyń» biýdjeti 40-50 million dollar degendi estigenmin. Endi, mine, direktor bolǵaly bárin kórip otyrmyn. Klýbtyń biýdjeti – 9 milliard 800 million teńge (25, 3 million dollar). Bul qarjynyń esebinen barlyq shyǵyndar jabylady: stadion men keńseni jalǵa alý, qyzmetkerler men fýtbolshylardyńjalaqysy, jolsapar shyǵyndary. Al qosymsha qarjylandyrý kózi retinde ÝEFA-dan túsken syiaqy men fýtbolshylardyń transferinen túsetin tabys ǵana. Onyń bárin klýb fýtbolshylarǵa syiaqy retinde úlestirýge jáne jańa oiynshylar satyp alýǵa jumsai alady», - deidi Gýrman.
Jaqynda «Astananyń» negizgi qorǵaýshysy Marin Anichich Túrkiianyń «Koniaspor» klýbyna aýysqan bolatyn. Keibir aqparat kózderi «Astana» Anichichti 1 million eýroǵa satty dep aitqan edi. Biraq Gýrmannyń sózine qaraǵanda olai emes sekildi.
«Menińshe, 30 jastaǵy fýtbolshyny satyp, bes dollar paida tapsań da óte jaqsy. Anichichti biz Tomashevichke almastyrdyq. Nátijesinde 100 myń dollar kóleminde paida taptyq», - deidi ol.
Bas bapker Grigorchýkqa el chempionatyn utý jáne Eýropa ligasynyń toptyq kezeńine joldama alý tapsyrylǵan.
«Eýrokýboktaǵy basty tapsyrma – toptyq kezeńge joldama alý. Qalǵanyn sosyn kóre jatamyz. Biraq ol jaqta týrist bolǵymyz kelmeidi. Topta oinaý kerek jáne fýtbolshylarǵa bosańsýǵa múmkindik berýge bolmaidy. Áitpese,bizde topqa kirse, barlyq másele sheshilgendei júretinder bar. Ol jaramaidy!», - deidi Gýrman.
