Elordada ótip jatqan Astana klýbynyń 6-otyrysy kúntártibindegi basty másele pandemiia saldaryn joiýǵa qatysty bolady. Bul jaiynda Álemdik ekonomika jáne saiasat institýtynyń sarapshysy Jumabek Sarabekov aitty, dep habarlaidy QazAqparat tilshisi.
«Kúntártibindegi basty másele – pandemiia. Jalpy álem halqyn alańdatyp otyrǵan da osy másele ekeni belgili. Osy «pandemiiadan qalai shyǵamyz?», «ekonomikamyzdy qalpyna keltirý protsesi qalai júredi?» degen máseleler talqyǵa túspek. Pandemiiadan keiin jańa álemge aiaq basqaly otyrmyz. Al sol álem qandai bolmaq, erejeleri qandai bolmaq? 6-shy otyrystyń aiasynda Qazaqstan Táýelsizdiginiń 30 jyldyǵyna arnalǵan sessiia uiymdastyrylady. Sessiia barysynda elimizdiń 30 jylda júrip ótken jolyna qorytyndy jasap, «aldaǵy ýaqytta Qazaqstandy qandai qaýip-qaterler kútip tur?» «qandai múmkindikterimiz bar?», «qai baǵytta qozǵalýymyz kerek?» degen máselelerdi talqylaimyz», - dedi otyrys aiasynda BAQ ókilderine bergen suhbatynda.
Onyń atap ótýinshe, Astana klýby aiasynda álemniń úzdik sarapshylary, memleket qairatkerleri elordaǵa jinalyp, kópshilikti tolǵandyrǵan ózekti suraqtarǵa jaýap beredi.
«Otyrys 3 kúnge jalǵasady. Osy úsh kúnniń ishinde aldymyzda turǵan jahandyq máselelerdi sheshe almaityndyǵymyz túsinikti. Biraq, ózimizge qajetti suraqtardy sarapshylarǵa qoiyp, soǵan jaýap alamyz. Jalpy, alqaly jiynǵa álemniń 20 elinen 30-ǵa jýyq spiker oflain formatta qatysyp jatyr. Munan bólek biraz spikerimiz onlain rejimde qatysady. Jalpy 55 spiker bolady», - dedi Jumabek Sarabekov.
