Foto: pixabay.com
Májilis depýtaty Nartai Sársenǵaliev elordadaǵy sý tapshylyǵy máselesin qozǵady, dep habarlaidy Sputnik Qazaqstan agenttigi.
Depýtat 24 sáýirde Astana ákiminiń atyna sý máselesi boiynsha hat jazǵan. Degenmen jaýap áli kelmegen.
"Qazir barshańyz bilesiz, Astana halqynyń teń jartysy kóshede baklajka ustap, sý izdep, qańǵyp júrgen jaiy bar. Óitkeni jarty jylǵa jýyqtady – Astanada úilerde sý joq. Minekei, sońǵy bir-eki táýliktiń kóleminde sanaýly saǵatqa ǵana berilgeni bolmasa, halyq múlde sýsyz otyr. Munyń sebebin suraǵanymyzda, Astana ákimdigi "sorǵy-súzgi stantsiiasynyń úshinshisin salamyz, 2023 jyldyń sońynda ol tolyq iske qosylady, sol kezde sý tapshylyǵy sheshiledi" dedi. Bul naqty ma, joq pa degen saýalymyzǵa sol kúii jaýap bergen joq", - dedi Sársenǵaliev Májilistegi Úkimet saǵatynda.
Astana ákimdiginiń aqparatynsha, atalǵan súzgi-sorǵy stantsiiasy sýdyń óndiristik-qýattylyq tapshylyǵyn 2026 jylǵa deiin ǵana sheshedi.
"Demek, 2026 jyly bas qalanyń turǵyndary taǵy da sý izdep júrýge májbúr bola ma?", - dep ashyndy májilismen.
Sondai-aq ol elordadaǵy jylý tapshylyǵy máselesin de kóterdi.
"Aldyńǵy hatyma kelgen jaýapta Astana qalasynyń ákimdigi qazir qalada 403,9 gigakaloriia jylý energiiasy jetispeidi, bul aýa temperatýrasy minýs 23 gradýstan tómendegende, qalada jylý tapshylyǵy bolady dedi. Demek endi sý jetpegendei, jurt jylýsyz da qala ma? Bul másele qalai sheshiledi? Jylý men sýdyń jetispeitinin bile tura, qurylys kompaniialaryna jappai jer berip, úi salýyna qai ákim ruqsat berdi, onyń qandai nieti boldy? Osynyń anyq-qanyǵyn bilgimiz keledi", - dep surady depýtat Astana ákimdiginiń ókilinen.
Úkimet saǵatyna onlain qatysqan qala ákimdiginiń ókili sý máselesi jazdyń sońyna deiin sheshiletinin aitty.
"Sý boiynsha shilde aiynyń sońynda biz úshinshi sorǵy-súzgi stantsiiasyn bitiremiz, iske qosamyz. Al basqa suraqtarǵa resmi túrde aqparat beremiz", - dep qysqa qaiyrdy ákimdik ókili.
Eske salsaq, biyl 28 naýryzdan bastap elordada sýdy únemdeý sharalary engizildi. Osyǵan bailanysty "Astana sý arnasy" kásiporny sý qysymyn retteý kestesin jariialady – belgili bir ýaqytta turǵyn úilerde sý qysymy tómendeidi jáne joǵarylaidy. Sý qysymyn retteý sharalary jańa sý sorǵylaý-súzgileý stantsiiasy iske qosylǵanǵa deiin atqarylady.
