«Astana klýbynyń» besinshi otyrysyna qatysatyn spikerler qatarynda reseilik saiasatkerler men sarapshylar bar, dep habarlaidy QazAqparat.
Mereitoilyq forým sarapshylary quramyna Resei strategiialyq zertteýler institýtynyń direktory Mihail Fradkov, RF Memlekettik Dýmasynyń komitet tóraǵasy, BRIKS zertteý jónindegi ulttyq komitettiń basqarma tóraǵasy Viacheslav Nikonov, EADB janyndaǵy Eýraziialyq turaqtandyrý jáne damý qorynyń bas ekonomisi Evgenii Vinokýrov, «Órkenietter dialogy» zertteý institýty baqylaý keńesiniń tóraǵasy Vladimir Iakýnin men Resei saiasi zertteýler ortalyǵy keńesiniń tóraǵasy Evgenii Býjinskii kirdi.
RF sarapshylary klýbtyń besjyldyq jumystaryna udaiy qatysyp keledi.
Jalpy aitqanda, biyl Nur-Sultan qalasynda halyqaralyq deńgeidegi 50-den astam sarapshy men saiasatker jáne diplomat bas qosady. Qazaqstan men Reseidi qosqanda AQSh, Ispaniia, Italiia, Japoniia, Serbiia, Aýstriia, Grýziia, Norvegiia, Qytai, Qyrǵyzstan, Úndistan, Belgiia, Aýǵanstan, Shvetsiia, Ońtústik Koreia men Ulybritaniia elderinen meimandar keledi.
Esterińizge sala keteiik, aimaqtaǵy qaýipsizdik pen geosaiasat máselelerin talqylaýǵa arnalǵan aýqymdy alańnyń besinshi jylsaiynǵy otyrysy 2019 jyldyń 11-12-shi qarasha kúnderi «Nazarbaev ortalyǵynda» ótedi. Klýb otyrysynyń basty taqyryby: «Úlken Eýraziia: jahandyq yntymaqtastyqtyń jańa qurylymy jolynda».
Klýbtyń saraptamalyq talqylaýyna AQSh, Qytai jáne Resei arasyndaǵy shielenistiń ýshyǵýy, saýda protektsionizmi men popýlistik kóńil-kúidiń ornyǵýy, sondai-aq Iran men Soltústik Koreia tóńireginde jańa kelispeýshilikterdiń boi kórsetýi syndy ózekti máseleler arqaý bolmaq.
Ásirese, Eýraziiada yntymaqtastyqtyń bolashaq qurylymyn qalyptastyrý taqyrybyna úlken kóńil bólinip, jahandyq qaýipsizdiktiń syn-tegeýrinderine (zymyran-iadrolyq saladaǵy baqylaýsyz jarys máselesi) qarsy turý joldaryn izdestirýge nazar aýdarylady.
Shara aiasynda Álemdik ekonomika jáne saiasat institýty Astana klýbynyń qoldaýymen jahannyń jetekshi sarapshylarynyń strategiialyq boljamdaryn baǵamdaǵan «Eýraziia 2020 úshin 10 basty syn-qater» reitingisiniń kezekti shyǵarylymy tanystyrylady.
Qazaqstannyń Tuńǵysh Prezidentiniń tóraǵalyǵymen ótetin, is-sharanyń negizgi ózegi sanalatyn Klýbtyń plenarlyq otyrysynda «Úlken Eýraziiany qurý: seriktestiktiń jańa úlgisi» taqyryby talqylanady.
Klýb jumysyn uiymdastyrýshylar - QR Tuńǵysh Prezidenti-Elbasy qory men Álemdik ekonomika jáne saiasat institýty.
«Astana klýbynyń» jumysyna dástúr boiynsha Qazaqstan Respýblikasynyń Tuńǵysh Prezidenti - Elbasy Nursultan Nazarbaev qatysady.
Besinshi basqosýdaǵy otyrystardyń bir bóligi «Chatham house» erejesine sai uiymdastyrylady. Iaǵni talqy jabyq sipatta ótkiziledi jáne álem men Eýraziianyń eń ózekti ári kókeikesti máseleleri ashyq kóteriledi.
Osy jyldar ishinde klýb otyrystaryna álemniń 40 elinen 200-den astam spiker qatysty.
