2019 jylǵy Astana Klýbynyń besinshi otyrysynyń baǵdarlamasy jariialandy. Sondai-aq mereitoilyq forýmnyń birqatar negizgi spikerleriniń esimderi belgili boldy, dep habarlaidy "Ult aqparat".
2019 jyldyń 11-12 qarashasynda «Nazarbaev Ortalyǵynda» aimaqtaǵy geosaiasat pen qaýipsizdik máselelerin talqylaýǵa arnalǵan úlken alań «Astana klýbynyń» besinshi jyl saiynǵy otyrysy ótedi. Besinshi otyrystyń taqyryby «Úlken Eýraziia: jahandyq yntymaqtastyqtyń jańa qurylymy jolynda» dep belgilengen.
Uiymdastyrýshylardyń málimetinshe, ekikúndik shara aiasynda dúniejúzinde qurlyqtardy ne kútip tur jáne jahandyq úderister qai baǵytqa qarai qarqyn alýda degen mańyzy saýaldar talqyǵa túsedi.
Klýbtyń saraptamalyq talqylaýyna AQSh, Qytai jáne Resei arasyndaǵy qyrǵi-qabaqtyń ýshyǵýy, saýda protektsionizmi men popýlistik kóńil-kúidiń artýy, sondai-aq Iran men Soltústik Koreia tóńireginde jańa shielenisterdiń boi kórsetýi syndy máseleler arqaý bolmaq.
Ásirese, Eýraziiada yntymaqtastyqtyń bolashaq qurylymyn qalyptastyrýǵa úlken kóńil bólinip, jahandyq qaýipsizdiktiń syn-tegeýrinderine qarsy turý joldaryn izdeý, sondai-aq iadrolyq qarýdy baqylaýsyz taratý máselelerine nazar aýdarylady.
«Shara aiasynda Álemdik ekonomika jáne saiasat institýty Astana klýbynyń qoldaýymen jahannyń jetekshi sarapshylarynyń strategiialyq boljamyn jinaqtaǵan «Eýraziia 2020 úshin 10 basty syn-qater» reitingisiniń kezekti shyǵarylymy tanystyrylady», delingen habarlamada.
Astana klýbynyń besinshi otyrysyndaǵy sessiia taqyryptary:
• «Álemdik tártip(sizdik): Bolashaq tarihty kim jazady?»
• «Kóppoliarly Eýraziia: Úzdiksiz qaqtyǵystar keńistigi?»
• «Ssaýda soǵysy jáne protektsionizm – jahandyq ekonomikanyń jai-kúii ne bolmaq?»
• «Dúniejúzilik tehnologiialyq jarys: Jahandyq qaqtyǵystyń jańa alańy»
• «Iadrolyq qarýsyzdanýdyń jańa tujyrymdamasy: Ne isteý kerek?»
• «Ortalyq Aziia jahandyq múddeler toǵysynda: Hartlendtiń artyqshylyqtary men kemshilikteri»
Kezekti basqosýǵa shartaraptyń 23 memleketinen geosaiasat, ekonomika men halyqaralyq qatynastar salasynyń mańdaialdy sarapshylary retinde moiyndalǵan 50-den astam halyqaralyq spiker qatysady dep kútilýde. Qurmetti meimandardyń qatarynda - 3 burynǵy memleket basshysy, 5 eks-premer-ministr, 10 ministr jáne 1 Nobel syilyǵynyń laýreaty bar. Forýmǵa qatysatyn sarapshylardyń geografiiasy keń. Atap aitsaq, AQSh, Ispaniia, Italiia, Resei, Japoniia, Serbiia, Aýstriia, Norvegiia, Qytai, Úndistan, Belgiia, Aýǵanstan, Shvetsiia, Portýgaliia, Ońtústik Koreia, Egipet, Bangladesh, Sloveniia, Qyrǵyzstan, Iran, Ulybritaniia, Pákistan elderi bar.
Qazaqstannyń Tuńǵysh Prezidentiniń tóraǵalyǵymen ótetin klýbtyń plenarlyq otyrysy – is-sharanyń negizgi ózegi «Úlken Eýraziiany qurý: seriktestiktiń jańa úlgisi» taqyrybyn zerdeleýge arnalady.
Biylǵy «Astana klýbynyń» negizgi spikerleriniń quramy:
Muhammed ál-BARADEI, Nobel syilyǵynyń laýreaty (2005), MAGATE-niń Bas direktory (2013-2014), Egipet
Djeikob FRENKEL, JP Morgan Chase International Direktorlar keńesiniń tóraǵasy, 30 (G 30) halyqaralyq tobynyń tóraǵasy, Izrail Ulttyq bankiniń tóraǵasy (1991—2000), AQSh
Joze Manýel BARROZÝ, Eýropalyq Komissiia tóraǵasy (2004-2014 jj.), Goldman Sachs International atqarýshy emes tóraǵasy, Portýgaliia.
Hamid KARZAI, Aýǵanstan prezidenti (2001-2014), Aýǵanstan.
Hose Lýis SAPATERO, Ispaniia premer-ministri (2004-2011), Ispaniia
Iv LETERM, Belgiia premer-ministri (2008, 2009-2011), IDEA halyqaralyq institýtynyń bas hatshysy, Belgiia.
Shaýkat AZIZ, Pákistan premer-ministri (2004-2007), Pákistan.
Danilo TIýRK, Sloveniia prezidenti (2007-2012), Sloveniia.
IýN Bionse, Koreia Respýblikasynyń Syrtqy ister ministri (2013-2017), Ońtústik Koreia.
Franko FRATTINI, Italiianyń Syrtqy ister ministri (2002-2004, 2008-2011), Italiia.
Mihail FRADKOV, Resei strategiialyq zertteý institýtynyń direktory, RF Úkimetiniń tóraǵasy (2004-2007), RF Syrtqy barlaý qyzmetiniń direktory (2007-2016).
Shara uiymdastyrýshysy - Qazaqstan Respýblikasy Tuńǵysh Prezidenti - Elbasynyń Qory jáne Álemdik ekonomika jáne saiasat institýty.
Aita kterligi, «Astana klýbynyń» missiiasy - Qazaqstannyń syrtqy saiasatynyń basymdyqtary turǵysynan jahandyq kúntártibin qalyptastyrý úshin Eýraziianyń jetekshi sarapshylary, saiasi kóshbasshylary men diplomattaryn bir alańǵa biriktirý.
«Astana klýbynyń» jumysyna dástúr boiynsha Qazaqstan Respýblikasynyń Tuńǵysh Prezidenti - Elbasy Nursultan Ábishuly Nazarbaev qatysady.
«Astana klýby» otyrystarynyń bir bóligi «Chatham house» erejelerine sáikes ótkiziledi. Bul talqylaýdyń jabyq sipatta ótýin saqtaidy jáne qazirgi ýaqyttaǵy Eýraziia men álemniń eń ózekti máseleleriniń ótkir ári ashyq talqylanýyna múmkindik beredi.
