QR Ulttyq banki «Astana bankin» banktik jáne ózge de operatsiialardy júrgizý litsenziiasynan aiyrdy, dep habarlaidy "Ult aqparat".
«QR Ulttyq Banki basqarmasynyń 2018 jylǵy 18 qyrkúiektegi № 214 qaýlysyna sáikes «Astana Banki» AQ-ty «Qazaqstan Respýblikasyndaǵy bankter jáne bank qyzmeti týraly» Zańnyń 48-baby 1-tarmaǵynyń v), g) jáne m-1) tarmaqshalarynda kózdelgen negizder boiynsha tólem jáne aýdarý operatsiialary boiynsha sharttyq mindettemelerin júieli túrde, prýdentsiialyq normativterdi jáne oryndalýy mindetti basqa da normalar men limitterdi júieli túrde buzǵany, sondai-aq banktiń iri qatysýshysynyń ýákiletti organnyń ústeme kapitaldandyrý jónindegi talaptaryn oryndamaǵany úshin banktik jáne ózge de operatsiialardy júrgizýge Qazaqstan Respýblikasynyń Ulttyq Banki Bankke 2015 jylǵy 20 sáýirde bergen № 1.1.32 litsenziiasynan 2018 jylǵy 19 qyrkúiekten bastap aiyrý týraly sheshim qabyldandy» delingen habarlamada.
Málimetke sai, banktiń aktivteri men mindettemeleriniń bank sektorynyń aktivteri men mindettemelerindegi úlesiniń tómen bolýyna bailanysty (1%) bankti litsenziiadan aiyrýdyń basqa qarjy uiymdary úshin táýekelderi bolmaidy.
Qazaqstan Respýblikasy Ulttyq Banki Tóraǵasynyń 2018 jylǵy 18 qyrkúiektegi № 352 buiryǵymen ýaqytsha ákimshilik taǵaiyndaldy, oǵan Banktiń barlyq basqarý organynyń ókilettikteri ótti. Banktiń ýaqytsha ákimshiligi óz qyzmetin Banktiń taratý komissiiasy taǵaiyndalǵanǵa deiingi kezeńde júzege asyrady.
Ýákiletti organnyń normativtik quqyqtyq aktilerinde kózdelgen shyǵystarǵa, Bankke túsken aqshany esepke alýǵa bailanysty jaǵdailardy qospaǵanda, klientterdiń jáne Banktiń óziniń banktik shottary boiynsha barlyq operatsiia 2018 jylǵy 19 qyrkúiekten bastap toqtatyldy.
Qazaqstan Respýblikasynyń Ulttyq Banki zańnamada belgilengen tártippen sotqa Banktiń qyzmetin májbúrlep toqtatý (taratý) týraly ótinishpen júginedi.
Sot Bankti májbúrlep taratý týraly is qozǵaǵan kúnnen bastap Bankti ustaýǵa jumsalǵan aǵymdaǵy shyǵystarǵa bailanysty talaptardy qospaǵanda, kreditorlardyń Bankke talaptary taratý isinde ǵana usynylady.
Bank jeke tulǵalardyń depozitterine mindetti kepildik berý júiesiniń qatysýshysy bolyp tabylady, soǵan bailanysty depozitorlarǵa belgilengen tártippen kepildik ótemaqysy tólenetin bolady.
