Elorda ákimi Altai Kólginov qoǵamdyq kólik salasy keleshekte qalai ózgeretinin aitty, dep habarlaidy "Ult aqparat".
«Búgin Kazan Digital Week halyqaralyq forýmyna onlain qatystym. Basqa elderdegi áriptestermen birge intellektýal transport júielerin talqylap, tájiribemizben bólistik. Qoǵamdyq tasymaldyń modernizatsiiasy men tsifrlanýy - basym baǵyttardyń biri. Avtobýstardy jańartyp qana qoimai, jańa marshrýttar qosyp, jol salyp, qalalyqtardyń yńǵaiy úshin elektrondy qarym-qatynas mehanizmderin engizý kerek» dep jazdy shahar basshysy Instagram paraqshasynda.
Altai Kólginov qaladaǵy kólik tasymalyn damytýda qolǵa alynǵan sharalardy tizip berdi.
«Birinshi - intellektýal transport júiesin damytý. Kóshe qiylystarynda turǵan baǵdarshamdardyń 50% adaptiv basqarý júiesimen qamtylǵan. Mundai tehnologiia kólik aǵynyn avtomatty rejimde eseptep, baǵyttar boiynsha sheshim qabyldaidy. Bul kólik aǵynynyń jyldamdyǵyn arttyryp, jolda joǵalatyn ortasha ýaqytty 20% qysqartýǵa múmkindik berdi. Jyl sońyna deiin qaladaǵy kóshe qiylystarynyń 80% osy tsifrly júiemen qamtityn bolamyz. Bul - táýliktiń qarbalas ýaqytynda túiindi baǵyttarǵa júktemeni azaitady. Ekinshi - qaýipsizdikti qamtamasyz etý. Baqylaý kameralary jol-kólik oqiǵalaryn 20% qysqartyp, ólimge ákep soǵatyn jaǵdailardy 40% azaitýǵa múmkindik berdi. Úshinshi - qoǵamdyq tasymaldy damytý. Qalalyqtardyń yńǵaiy úshin qalamańy kólik qatynasyn engizdik (32 eldimekenge qyzmet kórsetiledi), ekspress , sport shuttle bus marshrýttar da bar (buqaralyq mádeni sharalar úshin)», - deidi ol.
Shaharda turǵyndardyń ótinishi boiynsha 40 marshrýt ońtailandyrylǵan. Qoǵamdyq kóliktiń 70% astamyn jańartyp, jyl basynda kóshelerge 100 jańa elektr avtobýs shyqty. Jyl sońyna deiin elektr avtobýstardyń taǵy bir partiiasy shyǵady.
«Barlyq avtobýs jolaqy tóleýdiń elektrondy júiesimen jabdyqtalǵan, bul karantin kezeńinde indet juqtyrý yqtimaldyǵyn azaitty. Elektrondy esep aiyrysýǵa 100% ótýdiń arqasynda 6 mlrd teńge «kóleńkeli ainalymnan» shyǵaryldy. Sonymen birge, qalalyqtar avtobýstardyń qai jerde kele jatqanyn mobil qosymsha arqyly qarap, aialdamalardaǵy elektrondy tablolardan kóre alady» deidi Altai Kólginov.
Jalpy, qalada avtobýs jolaqtary da nátijesin berdi: avtobýstardyń joldaǵy ortasha ýaqyty 15-20% qysqardy. Jolaqtardyń sany 24-ten 36-ǵa deiin kóbeiedi. Bul avtobýsty kútý ýaqytyn taǵy 15% azaitady.
Barlyq baǵyttar boiynsha jumystar turaqty júrgizilip keledi.
