Astana qalasynyń ákimi Jeńis Qasymbek Instagram paraqshasynda Parij Olimpiadasynyń kúmis júldegeri Nurbek Oralbai men onyń jattyqtyrýshysyna arnaiy syilyq berilgeni týraly jazdy, dep habarlaidy elorda ákimdiginiń resmi saity.
«Parijde ótken Olimpiada oiyndarynyń kúmis júldegeri Nurbek Oralbaimen jáne onyń jattyqtyrýshysy Asqar Erkebaevpen kezdestim. Nurbek Oralbai elimizdiń ári qalamyzdyń atynan synǵa tústi. Onyń bul jetistiginiń artynda myńdaǵan saǵattyq jattyǵýlar, sol siiaqty otbasynyń, jattyqtyrýshysynyń jáne týystarynyń qoldaýy men ózine degen senimi jatyr. Demeýshiler esebinen Nurbek Oralbaiǵa Land Rover Defender avtokóliginiń kilti, al jattyqtyrýshysyna 10 mln teńgeniń sertifikaty tabys etildi. Sportshylarymyzǵa biik-biik shyńdardy baǵyndyrýyn tileimin!» – dep jazdy Jeńis Qasymbek.
Eske sala keteiik, bokstan erler arasynda 80 keli salmaqta Nurbek Oralbai Parij Olimpiadasynyń kúmis júldegeri atandy.
