Astana qalasy ákimdiginiń kezekti otyrysynda elorda basshysy Baqyt Sultanov birqatar sheneýnikti jazalady, dep habarlaidy "Ult aqparat" Astana ákimdiginiń resmi saityna silteme jasap.
Jiyn barysynda qaladaǵy qudyqtardyń birine qulap, qaza tapqan jasóspirimniń oqiǵasyna qatysty ýákiletti tulǵalardyń jaýapkershiligi týraly sóz boldy.
"Ókinishke orai, 19 aqpanda taǵy bir qaiǵyly oqiǵa boldy. 13 jastaǵy jasóspirim qaladaǵy ashyq qudyqtyń birine qulap, qaza tapty. Tótenshe jaǵdai ótkendegidei Almaty aýdanynyń aýmaǵynda oryn aldy. Ashyq qudyq "Astana Sý Arnasy" memlekettik kásipornyna tiesili. Osydan birneshe ai buryn jasóspirim qyz dál osyndai jaǵdaida qaitys bolǵanda aýdan ákimderine qatań sógis jariialaýmen ǵana shektelip edik. Bul jazalaý túri sizderge az siiaqty bolyp otyr! Endeshe, Almaty aýdanynyń ákimi Ádilbek Sársembaevqa qatań sógis jariialaimyn", – dedi qala ákimi.
Otyn-energetika kesheni jáne kommýnaldyq sharýashylyq basqarmasy basshysynyń orynbasary Igor Alekseevke, "Astana Sý Arnasy" MKK direktory Tabiǵat Zeinýlqabdenge, káriz qyzmetiniń basshysy Qýanysh Sultanbaev pen Almaty aýdany káriz ýchaskesiniń basshysy Vladimir Vlasenkoǵa osyndai jaza belgilendi. Qalalyq qoǵamdyq densaýlyq saqtaý basqarmasy basshysynyń mindetin atqarýshy Áliia Rústemova da Astana ákiminen sógis aldy.
Qudyqtar qaqpaǵynyń urlanýyna qarsy qalalyq ákimdik kóptegen jumys atqaryp jatyr. Qaladaǵy barlyq qudyqtardyń tizimi qaita jasalýda. Qaqpaqtardy polimerlik materialdan, sondai-aq arnaiy torlardy polietilennen jasaý kózdelgen.
"Tor qudyq qaqpaǵy urlanǵan kúnniń ózinde adamnyń, jan-janýardyń taǵy da basqa zattardyń túsip ketýinen saqtaidy. Qazir 6 myń qudyqqa tor ornatylǵan", – dep habarlady otyn-energetika kesheni jáne kommýnaldyq sharýashylyq basqarmasy.
Sonymen qatar, Astana qalasynyń politsiia departamenti júieli túrde tekseris, eskertý, túsindirý jumystaryn júrgizedi.
Baqyt Sultanov 19 aqpandaǵy №2 perinataldyq ortalyqta bolǵan jantúrshigerlik oqiǵany tilge tiek etti. Ortalyqtyń bosaný bóliminde kelinshek dárigerlerdiń kómeginsiz, ózi edende bosanyp qaldy.
"Abyroi bolǵanda bala men ananyń densaýlyǵyna ziian kelmegen. Biraq, bul jaǵdai erekshe baqylaýǵa alynýy tiis dep oilaimyn. Mundai oqiǵalar júiesizdiktiń saldarynan oryn alǵan", – dedi Sultanov.
Sonymen qatar, ol 2018 jyly bosaný kezinde segiz áieldiń qaitys bolǵanyn, oqiǵalar sany 2017 jylǵy kórsetkishten tórt ese joǵary ekendigin alǵa tartty.
"Bizdiń densaýlyq saqtaý júiesinde mundai bei-bereketsizdik nege bolyp jatyr?"– dep surady qala ákimi Áliia Rústemovadan.
"Mundai jaǵdaidyń bolǵany ras. Áiel 18 aqpanda perzenthanaǵa tústi. 19 aqpanda onyń tolǵaǵy kúsheie bastaǵan. Saǵat 12-de bólim meńgerýshisi ony qaraǵanda, bosaný bóliminde bolǵan. Jyldam bosandy. Ol kúni bólimde 37 áiel sábiin dúniege ákeldi. Osy ýaqytta úsh akýsher tórt áieldi bosandyryp jatqan bolatyn. Sondai-aq, bólimde kúrdeli operatsiia jasalyp jatty. Oǵan dárigerlerimizdiń barlyǵy jumyldyrylǵan bolatyn. Ne desek te, bul jaǵdaida olqylyqtar bar", – dedi Rústemova.
"Demek, tiisti kúsh salý kerek. Sizge resmi túrde eskertý jasap otyrmyn. Barlyq júie boiynsha sharalar qoldanyńyz. Bul barlyq basqa meditsinalyq mekeme úshin belgi bolýy tiis. Sondai-aq, barlyq densaýlyq saqtaý nysanynyń jumysyna monitoring júrgizip, shtattan tys barlyq jaǵdai boiynsha naqty is-qimyl algoritmin pysyqtańyz", – dedi Sultanov.
