Pekin koronavirýsqa "der kezinde jaýap berdi" deýge kelmeidi. DDSU Qytai ashyqtyq tanytty dep aitqanmen shyn máninde Qytai biligi álem, onyń ishinde birinshi kezekte DDSU qajetsingen aqparatty shektegen dep jazdy agenttik.
Qytai virýs erekshiligi týraly zerthana málimetterimen bóliskisi kelmei, indet qaýpin jasyrǵan kezde ártúrli elde ornalasqan úsh zerthana koronavirýstyń "qupiiasyn ashyp úlgergen".
Ondaǵan suhbat pen túrli derekterge súiengen AR aqparatty qatań baqylap, memlekettik densaýlyq saqtaý júiesinde básekege jol bermegen Qytai sol kezde aiyptaýǵa laiyq edi dep jazdy.
Qytai úkimetinen buryn basqa zerthana 11 qańtarda virýsologiia máselelerine arnalǵan saitta koronavirýs týraly málimet jariialaǵannan keiin Qytaidyń úkimettik zerthanalary genom jaily aqparat berdi. Biraq budan keiin de Qytai eki apta boiy málimet berýge yqylas tanytpady. DDSU jabyq otyrystarynyń hattamasyna sáikes, dál osy kezeńde álem naýqastar jáne virýstyń taraýy týraly tolymdy málimetke zárý bolǵan. AR eger sol kezde tolymdy málimetter bolǵanda bálkim, koronavirýstyń zardabyn azaitýǵa septeser me edi nemese onyń taraýyn báseńdetýge bolar ma edi dep topshylaidy.
Qupiia derekkózge súiengen agenttiktiń jazýynsha, DDSU-nyń resmi ókilderi sol kezde qajetti aqparat alý úshin Qytaidy kóptiń kózinshe maqtaǵan bolýy múmkin. Al jeke kezdesýler kezinde Qytai taraby virýs týraly qajetti aqparatty bermei otyr dep shaǵymdanǵan. Qytai mamandary DDSU-ǵa koronavirýstyń basqa elderge taraý qaýpi týraly boljamdarymen de bólispegen. Al halyqaralyq sarapshylardyń aitýynsha, tolymdy aqparatsyz koronavirýspen kúres josparyn qurastyrý óte qiyn.
