Kúsheitilgen karantin kezinde almatylyqtar Naýryz merkesine orai erekshe quttyqtaý aldy. Ushqyshsyz ushý apparatynyń kómegimen jaryq shoýy uiymdastyryldy. Megapolistiń keshki aspanynda gúl, Qazaqstan kartasy men shańyraq paida boldy, dep habarlaidy QazAqparat.
22 naýryzda Respýblika saraiynyń aldynan 300 dron ushyryldy. Almatylyqtar túngi aspannan: «Almaty sizdermen birge», «Naýryz merekesi qutty bolsyn», «Kak tebe takoe, Ilon Mask», degen jazýdy, sondai-aq shańyraq, Qazaqstan kartasy men gúldi tamashalady.
Turǵyndar erekshe kórinisti videoǵa túsirip, áleýmettik jelilerde bólisti.
Shoý uiymdastyrýshylardyń aitýynsha, bul Qazaqstandaǵy alǵashqy drondar shoýy.
«Biz qazaqstandyqtardy Naýryz meiramymen quttyqtaǵymyz keldi, biraq pandemiia men lokdaýn jaǵdaiynda ony júzege asyrý ońai bolǵan joq. Sondyqtan túngi aspanda jaryq shoýyn uiymdastyrý ideiasy keldi. Biz bul shoý arqyly almatylyqtarǵa tosynsyi jasaǵymyz kelgen. Alaida, bizdiń daiyndyq jumystarymyzdy bireýler videoǵa túsirip, áleýmettik jelide taratyp jiberipti. Sondyqtan qala turǵyndary bul shoýdy taǵatsyzdana kútti. Bizdiń maqsatymyz - Qazaqstan halqyn tańǵaldyryp, qýantý boldy. Pandemiianyń barlyq qiyndyqtaryna qaramastan, biz birgemiz. Ideiaǵa senip, jobany qoldaǵany úshin Almaty ákimdigine alǵysymyzdy bildiremiz», - dedi Qazaqstandaǵy uialy bailanys operatorynyń marketing jónindegi direktory Maksim Tsvykov.
