Internetti qoldaný arqyly qashyqtan oqýǵa kóshken oqýshylar sany 2,4 mln-ǵa jetti. Bul týraly QR Bilim jáne ǵylym ministri Ashat Aimaǵambetov aitty, dep habarlaidy QazAqparat.
«Búgin elimizdegi oqýshylar úshin tórtinshi toqsan bastaldy. Bul toqsan biz úshin erekshe, sebebi qashyqtyqtan oqytý boiynsha alǵash ret jumysty bastap otyrmyz. Qysqa merzim ishinde daiyndyq jumystaryn júrgizgen bolatynbyz. Bilim salasy úshin, bárimiz úshin bul úlken emtihan, sonymen qatar úlken múmkindik. Osy tájiribeden keiin bilim salasy ózgeretini aidan anyq. Qysqa merzim ishinde áriptesterimiz jańa quzirettilik alyp, qashyqtyqtan oqytý formatyna óte jyldam beiimdeldi», - deidi QR Bilim jáne ǵylym ministri Ashat Aimaǵambetov Ortalyq kommýnikatsiialar ortalyǵynda «Tótenshe jaǵdai kezinde qashyqtyqtan oqytýdyń jańa formattary» taqyrybynda ótken onlain brifingte.
Ol búgingi birinshi kúnniń negizgi nátijesine toqtalyp ótti.
«Ońai bolmasa da, qashyqtyqtan oqý formatyna kóshtik. Birinshiden, 3,2 mln oqýshy ártúrli baǵyt boiynsha qashyqtyqtan oqýdy bastady. Keibiri arnaiy daiyndalǵan internet baǵdarlamasy negizinde oqýyn bastasa, basqalary telearna arqyly oqýdy bastady. Internet júiesi arqyly birneshe internet platforma arqyly jumys júrgizip otyrmyz. Onyń ishinde bárimiz úirenip qalǵan Kúndelik, Daryn-onlain jáne taǵy da basqa platformalar bar. Jalpy internetti qoldaný arqyly qashyqtyqtan oqýǵa kóshkender sany búgingi kúni 2,4 mln oqýshyǵa jetti. Kúndelik platformasynda bir kún ishinde 2,2 million oqýshy tańǵy saǵat 07:00-den qazirgi ýaqytqa deiin jumys isteýde. Búgin tek Kúndelik platformasynyń ózinde 32 million sessiia ótti. Mundai buryn sońdy bolmaǵan. Daryn-onlain qosymshasyn tirkelip, daiyndalǵan videony qarap, bilim alýǵa bolady. Video sabaqtar bitkennen keiin naqty sol pán boiynsha beriletin suraqtarǵa jaýap berýge bolady. Jaýap qate bolsa videony qaitadan qarap, qateliktermen jumys isteýge múmkindikter qarastyrylǵan. Daryn-onlainǵa 300 myńǵa jýyq oqýshy tirkelip, bilim alýda», - deidi ol.
