QR Qorǵanys ministri Nurlan Ermekbaev sarbazdardy koronavirýstan qorǵaý úshin qandai shara jasalǵanyn aiyp berdi, dep habarlaidy "Ult aqparat".
«Qarýly Kúshterde adam sany aitarlyqtai kóp, sondyqtan barlyǵyna jii-jii test júrgizetin múmkindik joq. Biraq, bul jumystar bas sanitarlyq dárigerdiń qaýlysyna nemese vedomstvoaralyq komissiianyń sheshimine sáikes júrgiziledi. Barlyq qaýip toptary, áskerge shaqyrylǵandar jáne zapasqa shyǵatyndar PTR-testileýden ótedi. Odan da basqa qaýipsizdikti qamtamasyz etý boiynsha sharalary qarastyrylǵan. Baqylaý-ótkizý beketinde vizýaldy tekserý, qashyqtan termometriia jáne kelýshilerge saýalnama júrgiziledi. Rejim boiynsha shekteýler bar, bóten adamdarǵa áskeri bólim aýmaǵyna kirýge jáne áskeri qyzmetshiler, merzimdi qyzmet pen kýrsanttardyń syrtqa shyǵýyna ýaqytsha tyiym salyndy», - dep jaýap berdi N. Ermekbaev Ortalyq kommýnikatsiialar qyzmetinde tilshi suraǵyna.
Oqý synyptary men aýditoriialarda jáne jatyn úi-jailarda áskeriler keminde 2 metr qashyqtyqta ornalasqan.
«Qazir bir áskeri qyzmetshige arnalǵan tekshe metr aýa jáne sanitarlyq torap standarttaryn ózgertý jóninde jumys istep jatyrmyz. Sonymen qatar, bólmeni jii jeldetý, ylǵaldy tazalaý, barlyq jerde dezinfektsiia quraldarynyń bolýy jáne betperde kiiý mindetteldi, áskeri bólimderde qol alysýǵa tyiym salynady. Turaqty túrde áskerilermen áńgime-suhbat júrgiziledi, virýstan saqtaný joldary túsindiriledi», - deidi Qorǵanys ministri.
Sonymen birge, Qorǵanys ministrligi biýdjet qarajatynsyz, demeýshilik kómekpen 2 PTR-zerthana ashqan, olar Nur-Sultan jáne Almaty qalalarynda ornalasqan.
«Oǵan qosa, Úkimettiń qarjy-ekonomikalyq bóliminiń qoldaýymen taǵy eki PTR-zerthana jabdyqtadyq. Birneshe PTR jinaqtary men quraldardy sheteldik áskeri vedomstvolardaǵy áriptesterimiz qaitarymsyz kómek retinde jiberdi. Osylaisha, barlyq garnizonymyzdy qamtýǵa tyrysyp jatyrmyz. Azamattyq zerthanalarmen de kelisimder bekitilgen, iaǵni barlyq garnizondaǵy áskerilerimiz ádettegi zerthanalarǵa baryp, test tapsyra alady», - dedi Nurlan Ermekbaev.
Buǵan deiin Qorǵanys ministri 2 myńnan astam áskeri qyzmetshiniń koronavirýspen aýyrǵanyn aitqan edi.
