Túrkistanda QR XI jazǵy ýniversiadanyń resmi ashylýynda sapty saqtamai Memlekettik týdy alyp júrgen áskeri kiimdi adamdarǵa qatysty túsinik berildi, dep habarlaidy "Ult aqparat".
Áleýmettik jelide Túrkistan stadionynda Tý alyp júrgen áskerilerdiń videosy taralyp jatyr. Sapty saqtamai, uqypsyz adymdap kele jatqan áskeri kiimdegi 4 adam kópshiliktiń kúlkisin keltirse, áskeri ómirdi kórgen azamattar buǵan ashý bildirýde.
«QR XI jazǵy ýniversiadasynyń resmi ashylý saltanaty Túrkistan qalasyndaǵy Túrkistan Arena stadionynynda ótkizilgen bolatyn», - dedi sharany uiymdastyrýshy - Qoja Ahmet Iasaýi atyndaǵy Halyqaralyq qazaq-túrik ýniversitetiniń baspasóz qyzmetinen.
Baspasóz qyzmetiniń málimetinshe, atalǵan sharada QR Memlekettik týyn alyp júrgen azamattar áskeri qyzmetshiler emes – stýdentter. Sondai-aq saptyq adymmen júrý kezinde qatty jeldiń saldarynan olardyń júrisi birkelki bolmaǵan.
«Atap óteiik, Túrkistan qalasynda sońǵy 3-4 táýlikte qatty jel soǵyp tur. Stsenarii boiynsha uzaqtyǵy 150 metrdei saptyq júrý kezinde, jeldiń óte qatty turýyna bailanysty stýdentter áskeri júristiń tártibin buzýǵa májbúr bolǵan.
Al QR Qorǵanys ministrliginiń baspasóz qyzmeti Qarýly Kúshterge, basqa da áskerler men áskeri quralymdarǵa qatysy joq adamdarǵa arnaiy belgileri bar áskeri nysandy kiimdi kiiýge qoldanystaǵy zańnamada jol berilmeitinin atap ótti», - dep málim etti Túrkistan oblysynyń Óńirlik kommýnikatsiialar qyzmetinen.
