Foto: QR Qorǵanys ministrligi
Áskeri qyzmetshilerdiń jalaqysy 50 paiyzǵa ósedi. Jalaqyny ósirý 2025 jylǵy 1 qańtardan bastap eki kezeńde júzege asady. Bul týraly "Informbiýro" habarlady.
Qarýly kúshterdiń áskeri qyzmetshileriniń laýazymdyq jalaqysy eki jylda ortasha 50%-ǵa ósedi. Sondai-aq, áskeri qyzmetshilerge buryn toqtatylǵan jeńildikterdi qaitarý boiynsha jumys júrgizilip jatyr, dep habarlady qorǵanys ministriniń orynbasary, general-maior Baqytbek Sydyqov májilis depýtattarynyń saýalyna bergen jaýabynda.
Onyń túsindirýinshe, laýazymdyq jalaqy 2025 jylǵy 1 qańtardan bastap bir ret ósse, 2026 jylǵy 1 qańtardan bastap taǵy kóteriledi.
Budan bólek, áskeri qyzmetshilerge áleýmettik qoldaý kórsetý maqsatynda ózge de jeńildikter berý josparlanyp otyr. Mysaly, áskeri qyzmetshilerge kommýnaldyq qyzmet úshin tólenetin ústemaqy endi otbasynyń árbir múshesine tólenýi múmkin. Sondai-aq, áskeri qyzmetshiler men onyń otbasy músheleriniń jylyna bir ret demalys ornyna barý jáne qaitýy úshin jolaqysy tegin bolady. Odan bólek:
- - áskeri qyzmetshilerdiń qoǵamdyq kólikterde tegin júrýin qaitarý;
- - áskeri qyzmetshilerdiń jaýyngerlik, jumyldyrý jáne jedel daiyndyq baǵdarlamalary boiynsha 1 táýlikten artyq dalalyq jaǵdailarda bolýy barysynda, sondai-aq arnaiy dalalyq jumystardy oryndaý barysynda táýliktik normanyń 60 % esebinen dalalyq aqshalai úlesti qaitarý josparda bar.
"Qazir zeinetaqy taǵaiyndaý úshin jetkilikti eńbek ótili bar kelisimshart merziminiń aiaqtalýy boiynsha qyzmetten shyǵarylǵan kúshtik qurylymnyń qyzmetkerlerine eńbek ótili úshin zeinetker quqyǵyn berý (25 jyl eńbek ótili) jáne 1998 jyldan keiin birinshi ret áskerge kelgen jáne 2016 jylǵa deiin áskerden shyǵarylǵan kúshtik qurylymnyń qyzmetkerlerin eńbek ótili úshin zeinetkerlik tólemderin indeksteý máselesi qarastyrylyp jatyr", - dedi Baqytbek Sydyqov.
