Aldaǵy eki jylda áskeri qyzmetshilerdiń ailyq jalaqysy ortasha eseppen 60 paiyzǵa joǵarylaidy.
Bul týraly búgin Mańǵystaý oblysyna jumys sapary barysynda «Oimasha» poligonynda ótken «Otpantaý-2021» shuǵyl-strategiialyq komandalyq-shtabtyq áskeri oqý-jattyǵý jiynyna barǵan Qazaqstan Prezidenti Qasym-Jomart Toqaev aitty, dep habarlaidy "Ult aqparat".
Memleket basshysy munda áskeri nysannyń qyzmetimen tanysty.
Prezident armiianyń memleket pen qoǵam tarapynan jiti baqylanatyn nysan ekenin atap ótti. Sondai-aq Memleket basshysy áskerdi zamanaýi qarý-jaraqpen jáne tehnikamen odan ári jabdyqtaýǵa negizdelgen Qarýly Kúshterdi jáne basqa da áskerler men áskeri quramdardy damytý tujyrymdamasynyń bekitilgenin eske saldy.
Joǵarǵy Bas qolbasshy áskeri qyzmetshilerge keshendi áleýmettik qoldaý kórsetý máselelerine de toqtaldy.
– Qarjylandyrý máselesi kezeń-kezeńimen artyp keledi. Biyldan bastap áskeri qyzmetshilerdiń laýazymdyq eńbekaqylary 35 paiyzǵa ósti. Aldaǵy eki jylda ortasha eseppen 60 paiyzǵa joǵarylaidy. Barlyq sanattaǵy áskeri qyzmetshiler úshin turǵyn úi máselesi zańnamalyq turǵydan sheshilgen. TMD-nyń basqa elderine qaraǵanda qazaqstandyq áskerdiń áleýmettik toptamasy – básekege qabiletti. Áskeri qyzmetshilerdi áleýmettik qorǵaý máselesi árdaiym memleket basymdyq beretin salalardyń qatarynda bolady. Kúshti ásker – qýatty egemen Qazaqstannyń kepili, – dedi Prezident.
