Jambyl oblysyndaǵy qoimada bolǵan jarylysqa qatysty BAQ-taǵy habarlamalarǵa Qorǵanys ministrligi túsindirme berdi, dep habarlaidy "Ult aqparat" vedomstvonyń baspasóz qyzmetine silteme jasap.
«Injenerlik oq-dáriler qoimasynan órt shyqqan áskeri bólim «Ońtústik» óńirlik qolbasshylyǵynyń quramyna kiredi.
2016 jyldan bastap 2021 jyldyń mamyr aiyna deiin áskeri bólimniń komandiri Serik Baisaqalov bolǵan. Qorǵanys ministriniń buiryǵymen podpolkovnik Serik Baisaqalov 48 jasqa tolǵanda Qarýly Kúshterdiń qatarynan zapasqa shyǵaryldy. Al naqty Baisaqalov 2021 jyldyń 29 shildesinde bólimniń tiziminen alyndy», delingen habarlamada.
Ministrliktiń málimdeýinshe, maýsym aiynda óńirlik qolbasshylyqtyń komissiiasy bólimniń shtab bastyǵy maior Aslan Baqytjanovqa komandirdiń isteri men laýazymyn ýaqytsha atqarýdy tapsyrǵan. Bul jóninde bólim komandiriniń 2021 jylǵy 21 maýsymdaǵy №109 tiisti buiryǵy bar. Qazirgi kezde quzyretti organdar shtattyq bólim komandirin taǵaiyndaý maqsatynda jasalatyn tekserý protsedýrasy men kandidatqa arnaiy ruqsat berý rásimin júrgizýde.
«Órt bastalysymen áskeri bólimniń shtattyq órt sóndirý komandasy órt sóndirýshi eseptoptar kelgenshe tez arada ony oqshaýlaýǵa kirisken jáne Jambyl oblysynyń TJD-ǵa habarlaǵan.
Ol úshin TJD-nyń órt sóndirý qyzmetinde eldi mekende bolǵan órt kezinde qaýipti barlyq obektiler týraly málimetter bolýy tiis», delingen habarlamada.
Vedomstvo Baizaq aýdanyndaǵy úilerdiń aýlalarynyń birinen tabylǵan oq-dárilerdiń qaldyqtaryna qatysty túsinikteme berdi.
«Qorǵanys ministrligi paidalanýǵa jaramsyz oq-dárilerdi Indýstriia jáne infraqurylymdyq damý ministrliginiń vedomstvolyq uiymy – «Qaztehnologiia» aktsionerlik qoǵamyna beredi. Sodan keiin «Qaztehnologiia» AQ oq-dárilerdi óndiristik kádege jaratý, olardyń quramyndaǵy jarylys qaýpi bar zattardy alý jáne olardy joiý protsesin júrgizedi. Osydan keiin ǵana oq-dárilerdiń synyqtary elektrondyq gosreestr.kz. saýda alańy arqyly osyǵan ýákilettik berilgen «Qaztehnologiia» AQ arqyly satýǵa shyǵarylady. Tabylǵan snariadtardyń qalyptary men oqsaýyttary – bul oq-dárilerdi kádege jaratqannan keiin alynǵan jáne elektrondy saýda alańy arqyly jeke kásiporynǵa satylǵan metall synyqtary. Olar qorshaǵan ortaǵa eshqandai qaýip tóndirmeidi», delingen habarlamada.
Vedomstvonyń túsindirýinshe, bul metall synyqtaryn «Baqtiiar-Group» jaýapkershiligi shekteýli seriktestigi 2021 jylǵy naýryzdyń sońynda Túrkistan oblysy Arys qalasyndaǵy «Qazaqtehnologiia» AQ metall synyqtarynyń qoimasymen jasalǵan shartqa sáikes satyp alǵan.
«Arys qalasynan Jambyl oblysyndaǵy qoimaǵa artilleriia oq-dárileri – snariadtar, zymyrandar tasymaldanǵan emes. Arys qalasynan Jambyl oblysyndaǵy qoimaǵa burynǵy órtten aman qalǵan injenerlik oq-dárilerdiń bir bóligi ǵana jetkizildi. Óitkeni bul qoimada da osyndai oq-dáriler túri saqtalady. Bul qoimada artilleriia oq-dárileri saqtalmaidy», delingen habarlamada.
