Merzimdi áskeri boryshyn ótep júrgen jastar naryqta tapshy mamandyqtarǵa oqytylatyn bolady. Bul týraly QR Qorǵanys ministrliginen málim etti, dep habarlaidy QazAqparat.
Memleket Basshysy Qasym-Jomart Toqaev «Halyq birligi jáne júieli reformalar – el órkendeýiniń berik negizi» atty Qazaqstan halqyna Joldaýynda «Tegin tehnikalyq jáne kásiptik bilim berý» jobasyn iske asyrýdy jalǵastyrý qajettigin atap ótti.
Prezident kásibi baǵdar berý jáne jastardy oqytý júiesindegi Qarýly Kúshterdiń róline jeke toqtaldy: «Mamandyq alýdyń taǵy bir múmkindigi armiiada berilýi tiis. Merzimdi qyzmettegi sarbazdardyń ekonomikadaǵy naqty sektor úshin qajetti jumysshy mamandyǵyn igerý máselesin pysyqtaǵan jón».
«Qorǵanys ministrligi búginde eńbek naryǵynda suranysqa ie merzimdi qyzmettegi áskeri qyzmetshilerdiń mamandyqtaryna monitoring júrgizýde. Onyń nátijeleri boiynsha jumysshy mamandyqtary boiynsha daiarlaý uiymdastyrylady. Jastar áskerde boryshyn ótep júrgen kezde otandyq naryqta tapshy qajetti bilimdi, daǵdylar men mamandyqtardy tegin alady.
Sarbazdarǵa Qurlyq áskerleriniń, Áýe qorǵanysy kúshteriniń, Bailanys departamentteriniń, Radiatsiialyq, himiialyq, biologiialyq qorǵaý jáne ekologiialyq qaýipsizdik áskerleriniń kishi mamandaryn daiyndaityn oqý-jattyǵý ortalyqtarynda kásibi bilim beriletin bolady», - delingen ministrlik habarlamasynda.
Málim etilgendei, merzimdi áskeri qyzmetshiler qos maqsattaǵy áskeri mamandyqtardy meńgeredi. Onyń ishinde aýyr júk mashinalarynyń júrgizýshileri, ekskavatorshylar, traktorshylar, jol tósegishter, dizelister – elektrikter, bailanys mamandary jáne taǵy basqalar bar.
«Alǵan mamandyǵy jastarǵa áskerden keiingi ómirde de kádege jarary anyq.
Qurlyq áskerleriniń oqý-jattyǵý ortalyǵynda qazirdiń ózinde júk kólikteriniń júrgizýshilerin daiarlaýǵa arnalǵan oqý rotasy quryldy. Jyl saiyn munda eńbek naryǵynda suranysqa ie mamandyqtar boiynsha 160-qa jýyq maman daiarlaý josparlanyp otyr. Sabaqtar aldaǵy jyly bastalady», - dedi ministrlikten.
