Túrkistan oblysyndaǵy áskeri bólimnen qarý-jaraqtyń urlanýy isine qatysty taǵy bir kúdikti ustaldy, dep habarlaidy "Ult aqparat" Polisia.kz saityna silteme jasap.
«Jedel-tergeý toby Abylai Balǵynbaidyń sybailasy - taǵy bir figýrantty anyqtady. Málim bolǵandai, ol A.Balǵynbaidan aqshaǵa eki pistolet satyp alǵan. Olar keiinnen tárkilendi. Atý quralyn ne úshin satyp alǵany, sondai-aq jasalǵan qylmystyń mán-jaiy tergeý barysynda anyqtalatyn bolady. Kúdikti ýaqytsha ustaý abaqtysyna qamaldy. Sotqa deiingi tergeý jalǵasýda», - delingen aqparatta.
Esterińizge sala ketsek, 20 aqpan kúni Túrkistan oblysynda Áýe qorǵanysy kúshteriniń áskeri bólimshesinde kelisimshart boiynsha qyzmet etip júrgen kishi serjant A.Balǵynbai kezekshilikti óz betimen tastap shyǵyp, biraz qarý-jaraqty urlap ketken bolatyn. Sol kúni IIM jáne UQK qyzmetkerleriniń arnaiy jedel toby áskeri qyzmetshini qolǵa túsirdi. Keiin Abylai Balǵynbaidyń eki sybailasy ustaldy. Ishki ister ministri Erlan Turǵymbaev «atalǵan qarýdan eshkimge zalal keltirilmegenin « atap ótti.
