Búgin QR Parlamenti Senatynyń jalpy otyrysynda «Qazaqstan Resýpblikasynyń keibir zańnamalyq aktilerine qorǵanys jáne áskeri qyzmet máseleleri boiynsha ózgerister men tolyqtyrýlar engizý týraly» zań jobasy eki oqylymda qaralyp, qabyldandy, dep habarlaidy Ult.kz tilshisi QazAqparat agenttigine silteme jasap.
«Áskeri qyzmettiń áleýmettik aspektileri, turǵyn úi qatynastary týraly zańnamaǵa engiziletin ózgerister de kórsetilgen. Olar ákeri qyzmetshilerge jáne arnaýly memlekettik organdardyń qyzmetkerlerine de qatysty. Atap aitqanda, azamattar áskeri mindetterin oryndaǵan kezde ǵana emes, sonymen qatar osy qyzmet barysynda qaza tapqan áskeri qyzmetshilerdiń jesirlerine qyzmettik turǵyn úi berý usynylady. Bul rette qyzmetkerlerdiń jesirlerine ótemaqy mólsherin jańa turǵyn úidiń qunyna súiene otyryp esepteý qarastyrylyp otyr», - dedi QR Qorǵanys ministriniń orynbasary Talǵat Muhtarov zań jobasy boiynsha baiandama jasaý barysynda.
Budan bólek ol zań jobasy aiasynda bilim berý máseleleri boiynsha de túzetýler engizilip jatqandyǵyn jetkizdi.
«Birinshiden, QR Qarýly Kúshterinde tehnikalyq jáne kásiptik bilim berý salasyn keńeitý eskerilip otyr. 2015 jyly úsh áskeri mektep Bilim jáne ǵylym ministrliginen Qorǵanys ministrliginiń qaramaǵyna aýysty. Olar mektep, institýt, ýniversitet biryńǵai áskeri bilim berý júiesin qalyptastyrýǵa múmkindik berdi. Ekinshiden, bul áskeri oqý oryndarynan oqýdan shyǵarý tártibin reglamentteý qarastyrylǵan. Qoldanystaǵy zańnamada osy másele tiisti dárejede rettelmegen»,-dedi ministrdiń orynbasary.
Sonymen qatar ol áskeri meditsinalyq kadrlardy daiarlaý maqsatynda áskeri internatýra engizý máselesine toqtaldy.
«Biz áskeri meditsina fakýltetin ashtyq jáne internatýrasyz áskeri dárigerlerli daiarlaý múmkin emestigin jetkizgimiz keledi. Munymen qosa, «áskeri ǵylym» degen uǵymdy engizý jáne qorǵanys zertteýler júiesin odan ary qarai damytý máselesi qamtylyp otyr. Qazirgi zamanǵy soǵystardy júrgizýdiń jańa sharttary ǵylymi turǵydan tiianaqtaýdy qajet etedi. Áskeri ǵylymi áleýetti kúsheitpei, eldiń áskeri qaýipsizdigin naǵaitý týraly sóz qozǵaý múmkin emes. Nátijesinde, osy túzetýler QR Qorǵanys ministrligi júrgizip jatqan kadrlar daiarlaý júiesin jetildirý jáne áskeri ǵylymdy damytý jónindegi jumysty aiaqtaýǵa múmkindik beredi», - dedi Muhtarov.
