Áskerge shaqyrylatyn qazaqstandyqtar óziniń áskerden bosatylǵany nemese keiinge qaldyrylǵany týraly mártebesin SMS arqyly bile alady. Bul týraly Tsifrlyq damý, innovatsiialar jáne aeroǵarysh ónerkásibi ministri Baǵdat Mýsin málimdedi, - dep habarlaidy "Ult aqparat".
"Birneshe ai buryn elordalyq áskeri komissariattardyń birine baryp, Qorǵanys ministrliginiń ókilderimen birge osy salany tsifrlandyrý josparlaryn talqylaǵanbyz. Sonda kóterilgen máselelerdiń biri - áskerge shaqyrylatyn jastardy áskeri qyzmetke shaqyrýdan bosatý nemese keiinge qaldyrý maqsatynda talap etiletin anyqtamalardan aryltý bolatyn. Ol úshin birneshe júieni biriktirý qajet edi.
Araǵa ýaqyt salyp, birlesken jumystyń arqasynda nátijege qol jetkizdik. Máselen, biyl 1 naýryzdan bastap azamattar tolyp jatqan anyqtamalar men qujattardy usynbai, áskeri qyzmetti ótkerý týraly óz mártebesin bir júieden bile alady", - dep jazdy ministr Facebook paraqshasynda.
Onyń sózinshe, "Ulttyq aqparattyq tehnologiialar" AQ Qorǵanys ministrligimen birlesip, qazaqstandyqtardy áskerge shaqyrýdan bosatý jáne keiinge qaldyrý týraly aqparat beretin proaktivti memlekettik qyzmetti iske qosqan.
"Áskerge barýǵa mindetti er adamdarǵa, iaǵni 18-27 jastaǵy azamattarǵa áskerden bosatý nemese keiinge qaldyrý boiynsha tiisti aqparat telefondaryna habarlama retinde joldanady. Mobildi azamattar bazasynda tirkelgen qazaqstandyqtar ǵana habarlama alatynyn atap ótemin", - delingen jazbada.
Búginde 300 myńnan astam áskerge shaqyrylýshy 1414-ten ЅMЅ habarlama alyp úlgergen.
"Bul joba – azamattardyń ómirlik jaǵdailaryn negizge ala otyryp, olarǵa belsendi qyzmet kórsetý arqyly «kórinbeitin memleket» júiesin engizýdiń taǵy bir qadamy.
«Ulttyq aqparattyq tehnologiialar» AQ @nitec_kz pen Qorǵanys ministrligindegi áriptesterime úilesimdi jumystary úshin alǵys aitqym keledi! Bul qyzmet «Smart Data Ukimet» júiesi negizinde Qorǵanys ministrliginiń jáne basqa da memlekettik organdardyń júielerin biriktirý arqyly múmkin boldy" - dep túiindedi Baǵdat Mýsin.
