Foto: © Sputnik / Timýr Batyrshin
27 jasqa tolǵan áskeri boryshyn ótemegen adamǵa áskeri bilet berilmeidi. Bul týraly Qorǵanys ministriniń orynbasary, general-leitenant Sultan Kamaletdinov aitty, dep habarlaidy Kazinform.
«Armiiaǵa tsifrlyq tehnologiiany engizý jalǵasyp jatyr. Áskeri mindettini, áskerge shaqyrylýshyny esepke alý tsifrlyq formatqa aýystyryldy. Bul jergilikti áskeri basqarý organynyń jumysyn avtomattandyrýǵa múmkindik berdi. Biyl biz áýe qorǵanysy kúshteri úshin aqparattyq júieni qabyldadyq. Bul elimizdiń áýe keńistigin paidalanýda aqparat aǵymyn avtomatty rejimde óńdeýdi arttyrdy. Áýe shebin qorǵaýda sheshim qabyldaý ýaqytyn birneshe ese qysqartýǵa múmkindik berdi», — dedi Qorǵanys ministriniń orynbasary ortalyq kommýnikatsiialar qyzmetindegi brifingte.
Onyń atap ótýinshe, halyqpen ózara is-qimyl máselesine basa nazar aýdarylyp otyr.
«Qyzmet ótkermegen, onyń ishinde 27 jasqa tolǵan adamǵa endi áskeri bilet berilmeidi. Onyń ornyna áskeri mindettilik mártebesi onyń Egov jeke kabinetinde kórsetiledi. Jumysqa ornalasý kezinde áskeri qyzmetke qatysy týraly anyqtama alý qajet emes. Jumys berýshi bul aqparatty Egov-tan kóre alady. Tsifrlyq transformatsiia aiasynda birqatar qyzmetti avtomatty túrde júzege asyrý múmkin boldy. Sonymen qatar, 17 jastaǵy azamatqa jeke isti jinaqtaý protsesi tolyǵymen avtomattandyryldy. Tsifrlandyrý boiynsha barlyq bastama júieli túrde iske asady», — dedi Sultan Kamaletdinov.
