Qazaqstanda kóktemgi áskerge shaqyrý naýqany ótip jatyr. Azamattardy merzimdi áskeri qyzmetke shaqyrý 1 naýryzdan bastalyp, 30 maýsymǵa deiin jalǵasady, dep habarlaidy "Ult aqparat" Qorǵanys ministrliginiń baspasóz qyzmetine silteme jasap.
Vedomstvo azamattardy shaqyrý pýnktterine meditsinalyq komissiiadan ótý úshin shaqyrýǵa qatysty barlyq rásimder zańnamaǵa sáikes júrgiziletinin de habarlady.
18-den 27 jasqa deiingi áskerge shaqyrý jasyndaǵy jasóspirimder shaqyrtý qaǵazy jáne sms-habarlamalar barǵan jaǵdaida meditsinalyq komissiiadan ótýge kelýi qajet.
«Eger áskerge shaqyrylýshy birneshe ret habarlaǵannan keiin jinaý pýnktine kelmese, onda jergilikti áskeri basqarý organdarynyń qyzmetkerleri politsiia qyzmetkerlerimen birlesip jaltarýshynyń turatyn jáne jumys isteitin jerine barady.
Shaqyrý meditsinalyq komissiianyń nátijeleri boiynsha shaqyrylýshynyń merzimdi áskeri qyzmet ótkerýge jaramdylyq dárejesi aiqyndalady. Eger jas jigit jaramsyz dep tanylsa, onda sol kúni ol jinaý pýnktinen úiine qaitady. Eger áskerge shaqyrylýshy qosymsha tekserýdi qajet etse, onda ol meditsinalyq mekemelerge jiberiledi», - delingen ministrliktiń habarlamasynda.
Meditsinalyq komissiia tekserýinen sátti ótken jáne qyzmetke jaramdy dep tanylǵan áskerge shaqyrylýshylardyń árbirin ákimniń orynbasary tóraǵalyq etetin shaqyrý komissiiasy derbes qaraidy. Osylaisha, áskerge shaqyrý týraly sheshim qabyldanady.
Sonymen qatar, vedomstvo shaqyrý boiynsha meditsinalyq komissiia men áskeri qyzmetten jaltarý ákimshilik jáne qylmystyq jaýapkershilik retinde qaralatynyn eske saldy. Shaqyrý qaǵazy boiynsha meditsinalyq tekserýge kelmegen jaǵdaida 5 AEK mólsherinde aiyppul salynady.
«Áskeri qyzmetten jaltarý 1 myń AEK mólsherinde aiyppul salýǵa, ne sol mólsherde túzetý jumystaryna, ne 400 saǵatqa deiingi qoǵamdyq jumystarǵa tartýǵa, ne bir jylǵa deiingi merzimge bas bostandyǵyn shekteýge nemese odan aiyrýǵa ákep soǵady», - delingen ministrliktiń aqparatynda.
