Foto: Maqsat Shaǵyrbaev/ Kazinform
Qarýly kúshteri Bas shtaby Uiymdastyrý-jumyldyrý jumysy departamenti bastyǵynyń orynbasary Farhat Aidarbaev ortalyq kommýnikatsiialar qyzmetinde ótken baspasóz máslihatynda áskerden jaltarǵandarǵa qylmystyq kodekste qandai jaza qarastyrylǵanyn eske saldy.
Aitýynsha, merzimdi áskeri qyzmetke shaqyrtýdan bas tartqany úshin zańnamada qylmystyq jáne ákimshilik jaýaptylyq kózdelgen.
— Ákimshilik quqyq buzýshylyq týraly kodekstiń 647-babynda áskeri esepte turǵan nemese turýǵa mindetti azamattyń jergilikti áskeri basqarý organynyń shaqyrýy boiynsha kórsetilgen merzimde dáleldi sebepsiz kelmeýi 5 ailyq eseptik kórsetkish (19 660 teńge) mólsherinde aiyppul salýǵa ákep soǵady.
Osy kodekstiń 648-babynda áskerge shaqyrý komissiiasynyń joldamasy boiynsha meditsinalyq kýálandyrýdan ne tekserilýden jaltarǵany úshin áskerge shaqyrylýshylarǵa eskertý jasaýǵa ne 3 AEK (11 796 teńge) mólsherinde aiyppul salýǵa ákep soǵady.
Qylmystyq kodekstiń 387-babyna sáikes áskeri qyzmetten bosatýǵa zańdy negizder bolmaǵan kezde jaltarý bir 1000 AEK-ke deiingi (3 mln 932 myń teńge) mólsherde aiyppul salýǵa ne sol mólsherde túzeý jumystaryna, ne 400 saǵatqa deiingi merzimge qoǵamdyq jumystarǵa tartýǵa, ne bir jylǵa deiingi merzimge bas bostandyǵyn shekteýge, ne sol merzimge bas bostandyǵynan aiyrýǵa jazalanady, — dedi Farhat Aidarbaev.
Sondai-aq, ol áskerge barmaý úshin óz densaýlyǵyna qasaqana ziian keltirý, «aýrýmyn» dep jalǵan qujat jasaý siiaqty áreketter qatań jazalanatynyn eskertti.
