Aqtóbe garnizonynyń áskeri soty merzimdi áskeri qyzmet ótkerip júrgen sarbazdy soqqyǵa jyqqan serjantqa qatysty úkim shyǵardy, dep habarlaidy ult.kz.
Sot materialdaryna sáikes, merzimdi áskeri qyzmetshilerge jaýapty bolǵan serjant qaramaǵyndaǵy sarbazdy uryp-soǵyp, onyń densaýlyǵyna ortasha aýyrlyqtaǵy jaraqat keltirgen.
Sot otyrysynda aiyptalýshy óz kinásin moiyndamai, ózin aqtaýdy surady. Degenmen ol azamattyq talap aiasynda jábirlenýshiniń sottaǵy ókiliniń qyzmetine jumsalǵan shyǵyndy ishinara óteýge kelisim bildirdi.
Sot serjanttyń kinási sot-meditsinalyq saraptamanyń qorytyndysymen, jábirlenýshi men kýálardyń, sondai-aq sarapshynyń aiǵaqtarymen tolyq dáleldengenin atap ótti.
Sot úkimimen áskeri qyzmetker kináli dep tanylyp, bir jylǵa bas bostandyǵynan aiyryldy. Sonymen qatar ol jábirlenýshige 700 myń teńge kóleminde moraldyq ótemaqy jáne 900 myń teńge sot shyǵyndaryn tóleýge mindetteldi.
Qazirgi ýaqytta sot úkimi zańdy kúshine engen joq.
