Qazaqstan Elshisi Asqar Jumaǵaliev Niderland Koroli Villem-Aleksandrǵa saltanatty túrde senim gramotalaryn tapsyrdy, dep habarlaidy "Ult aqparat".
QR Syrtqy ister ministrliginen málim etkendei, rásimnen keiin «Nordeinde» saraiynda diplomattyń monarhpen ekijaqty kezdesýi ótti, onyń barysynda taraptar Qazaqstan men Niderland arasyndaǵy saiasi, saýda-ekonomikalyq yntymaqtastyqty odan ári nyǵaitýǵa baǵyttalǵan basym máselelerdi talqylady.
A.Jumaǵaliev Villem-Aleksandrǵa Qazaqstannyń qazirgi syrtqy saiasatymen jáne ekonomikalyq bastamalarymen tanystyrdy. Ol sondai-aq Prezident Qasym-Jomart Toqaev Niderlandpen keshendi yntymaqtastyqty damytýǵa úlken mán beretinin jáne joǵary deńgeidegi bailanystar eki el arasyndaǵy senimdi dialogtyń berik negizin qalaǵanyn atap ótti.
«Óz kezeginde Korol Villem-Aleksandr eki el arasyndaǵy yntymaqtastyqtyń joǵary deńgeiin airyqsha atai otyryp, Niderland Qazaqstanmen saiasi jáne ekonomikalyq bailanystardy odan ári órbitýge múddeli ekenin belgilep ótti. Ol sondai-aq 2014 jylǵy naýryzda Gaagadaǵy Iadrolyq qaýipsizdik sammiti aiasynda Qazaqstan Respýblikasynyń Tuńǵysh Prezidenti Nursultan Nazarbaevpen kezdesýin eske túsirdi. Diplomat Elbasynyń sol Forýmda sóilegen sózinde Qazaqstannyń iadrolyq synaq poligonyn birinshi bolyp jaýyp, sonymen qatar iadrolyq qarýdan erikti bas tartqany týraly aitqany týraly qosty. Osyǵan orai, ol 2021 jyly N. Nazarbaevtyń álemdegi eń iri Semei iadrolyq synaq poligonyn jabý arqyly qaýipsiz jáne ornyqty álemniń qalyptasýyna erekshe úles qosqan tarihi sheshiminiń 30 jyldyǵy atap ótiletindigi týraly habarlady», - delingen aqparatta.
