Astanada birneshe adamdy qutqarǵannan keiin qaza bolǵan órt sóndirýshi Asqar Zabikýlinniń jubaiy men balalaryna grant bólinedi, dep habarlaidy Sputnik Qazaqstan Ǵylym jáne joǵary bilim ministrligine silteme jasap.
Resmi málimetke sáikes, órt sóndirýshiniń qazasyna bailanysty joǵary oqý oryndaryna Asqar Zakibýlinniń otbasy úshin granttar bólý múmkindigin qarastyrý máselesi tapsyrylǵan bolatyn. Qazirgi ýaqytta eki otandyq joǵary oqý orny grant berýge daiyn ekenin málimdedi.
"Safi Ótebaev atyndaǵy Atyraý munai jáne gaz ýniversiteti Asqar Zabikýlinniń balalaryna orta mektepti bitirgennen keiin kez kelgen bakalavriat mamandyqtarynda grantpen oqýǵa múmkindik bermek. Sondai-aq Asqar Zabikýlinniń balalary 2023 jyly jazda ýniversitettiń jataqhanasynda turyp, IT-lagerge jáne jazǵy tildik mektepke qatysa alady. Sonymen qatar jubaiy Anel Zabikýlina úshin "Adam resýrstaryn basqarý" mamandyǵy boiynsha MVA-da oqýǵa grant bólindi", - delingen resmi habarlamada.
MVA grantyn AlmaU bólip otyr. Ony 2023-2026 jyldary aralyǵynda qoldanýǵa bolady.
Aita keteri, "Bilim týraly" zańǵa sáikes, arnaýly memlekettik organdar jáne quqyq qorǵaý organdary, azamattyq qorǵaý organdary, memlekettik feldeger qyzmetkerleriniń óz mindetin atqarý kezinde qaza tapqan nemese mertigip qalǵan jaǵdaida áskeri qyzmetshilerdiń balalarynyń ótinishi negizinde olarǵa konkýrstan tys bilim berý granty beriledi.
