Prezidenttik jastar kadr rezervine irikteý ashyq ótti. Bul týraly Jastar kadr rezervi jónindegi Sarapshylar komissiiasyna baqylaýshy retinde qatysqan «QazAqparat» HAA» JShS bas direktory Asqar Ýmarov málim etti.
«Jaqynda Prezidenttik jastar kadr rezervine irikteýdiń qorytyndy kezeńi ótken bolatyn. Men kandidattarmen áńgimelesetin Sarapshylar komissiiasynyń quramyna baqylaýshy retinde engen edim. Sondai-aq, Marat Bashimov, Artýr Platonov, Daniiar Áshimbaev jáne basqa da tanymal sarapshylar, qoǵam qairatkerleri de baqylaýshy boldy. Al komissiia quramy QR Prezidenti Ákimshiligi, Memlekettik qyzmet isteri jónindegi agenttik, sonymen qatar akademiialyq orta ókilderinen jasaqtalǵan. Jalpy alǵanda barlyq jumys tsifrlyq tehnologiialar qoldanyla otyryp, jetkilikti deńgeide ashyq ótti, iaǵni daýys quqyǵyna ie komissiianyń árbir múshesine jeke-jeke planshetter berilgen, olar irikteý barysynda kandidattarǵa qatysty kórsetkishterdi birden qoiyp, baǵa berip otyrdy. Bul rette Memlekettik qyzmet isteri jónindegi agenttik tarapynan jumystardyń jaqsy uiymdastyrylǵanyn da atap ótkim keledi. Irikteýge asa belsendi, bilimi tereń jastar qatysty, osynyń ózi komissiia múshelerine baǵa berýde qiyndyq týdyrǵany málim. Soǵan qaramastan, meniń oiymsha, komissiia eń úzdikterdi tańdai aldy. Jalpy alǵanda 330 jas iriktelgen, endi osy jas mamandardyń 300-i prezidenttik jastar kadr rezervine engizýge usynylady. Al odan ary qarai rezervke engen tulǵalar elimizdegi memlekettik qyzmet salasynyń jańarýy men jańǵyrýyna jumys isteidi», - dedi A.Ýmarov.
Onyń aitýyna qaraǵanda, komissiia eki apta boiy saǵat 9:00-den 19:00-ge deiin tapjylmai otyryp jumys istedi. Árbir úmitkerge shamamen 7 minýt bólindi, osy ýaqyt ishinde komissiia músheleri suraq qoiyp, alǵan jaýaptary boiynsha sheshim qabyldap, ony ózderiniń qolyndaǵy planshette belgileýge úlgerip otyrýy tiis boldy.
Eske sala keteiik, QR Prezidenti Qasym-Jomart Toqaev óziniń sailaý aldyndaǵy baǵdarlamasynda Prezidenttik jastar kadr rezervin qurý qajettigin aiqyndap, mundai rezerv jastar úshin tiimdi áleýmettik lift bolýy kerektigin atap ótken edi.
Rezervke irikteý jumysyna memlekettik qyzmetkerler, kvazimemlekettik sektor, jeke sektor jáne azamattyq qoǵam ókilderi qatysty. Úmitkerlerdi tirkeý biylǵy jyly 1-30 qyrkúiek aralyǵynda ótti. Negizgi talap boiynsha kandidat jasy 35-ten aspaǵan Qazaqstan Respýblikasynyń azamaty bolyp, bilimi men jalpy eńbek ótili 5 jyldan kem bolmaýy tiis edi.
Úmitkerlerdi irikteý 6 kezeń boiynsha ótti. Birinshi kezeń – qujat qabyldaý. Ekinshi kezeń – kandidattardyń kúrdeli mátindik jáne sandyq aqparattarmen jumys isteý múmkindikterin anyqtaýǵa arnalǵan testileý. Úshinshi kezeń – testiler qorytyndysy. Tórtinshi kezeń - kandidattyń áleýetin, sonyń ishinde onyń liderlik qasietin, strategiialyq oilaý deńgeiin, motivatsiia men qundylyq boiynsha baǵalaý. Bul kezeńde úmitkerler esse jazyp, ózderiniń áleýmettik mánge ie jobalaryn tanystyrdy, al adam resýrstary salasyndaǵy arnaiy sarapshylar qatysýshylardyń quzyretin baǵalady. Besinshi kezeń – úmitkerler Sarapshylar komissiiasynda áńgimelesýden ótti. Bul etapqa osyǵan deiingi kezeńderde ball jiyntyqtary boiynsha úzdik nátije kórsetkender jiberildi.
Aita keteiik, búgin Ortalyq kommýnikatsiialar qyzmetindegi baspasóz máslihatynda QR Prezidenti Ákimshiligi Basshysynyń orynbasary Máýlen Áshimbaev Prezidenttik jastar kadr rezervine engen 300 qazaqstandyqtyń anyqtalǵanyn jariia etti.
