Úkimet basshysy Asqar Mamin elimizde jergilikti qamtý jumysyn kúsheitip, onyń qyzmetine biznes ókilderin keńinen tartýdy tapsyrdy, dep habarlaidy QazAqparat.
«Jergilikti qamtýdy damytý ákimderdiń negizgi mindetteriniń biri ekenin taǵy da atap ótkim keledi, olardyń jumysy osy mindet boiynsha baǵalanady. Osyǵan bailanysty mynalarǵa nazar aýdarǵym keledi. Birinshiden, ákimdikter jergilikti qamtýdy baqylaý jónindegi óńirlik komissiialardyń jumysyn kúsheitip, onyń qyzmetine jergilikti biznesti barynsha tartýy kerek. Ekinshiden, jer qoinaýyn paidalanýshylardyń satyp alýy – bul da otandyq óndirýshilerdi damytý men qoldaý úshin áleýeti zor iri alań», - dedi Asqar Mamin Úkimet otyrysynda.
Sondai-aq, Premer-Ministr jergilikti qamtýdy damytýǵa qatysty ministrler men quzyrly vedomstvo basshylaryna da birqatar mindet júktedi.
«Indýstriia jáne infraqurylymdyq damý, Energetika ministrlikterine, «Samuryq-Qazyna» qoryna jer qoinaýyn paidalanýshylarmen erikti kelisimder jasasýdy qamtamasyz etýdi tapsyramyn. Úshinshiden, Indýstriia jáne infraqurylymdyq damý ministrligi Energetika ministrligimen, Ulttyq kásipkerler palatasymen birlesip, jer qoinaýyn paidalanýshylardyń otandyq taýar óndirýshilermen offteik-sharttar jasasýynyń barlyq qajetti máselelerin pysyqtaýdy tapsyramyn», - deidi ol.
Atalǵan jumystyń iske asýyna Úkimet basshysynyń orynbasary Roman Skliar jaýapty bolady.
