QR Premer-Ministri Asqar Maminniń tóraǵalyǵymen jáne QR Parlamenti Májilisiniń tóraǵasy Nurlan Nyǵmatýlinniń qatysýymen ótken Jańǵyrtý jónindegi ulttyq komissiia otyrysynda «Tuńǵysh Prezident – Elbasy N. Nazarbaevtyń bes institýtsionaldyq reformasyn iske asyrý jónindegi 100 naqty qadam» ult jospary men QR Prezidenti Q. Toqaevtyń 2019 jylǵy 2 qyrkúiektegi Joldaýyn iske asyrý jónindegi Jalpyulttyq is-sharalar josparyn (JUJ) oryndaý barysy qaraldy. Bul týraly Úkimet basshysynyń resmi saitynda jariialandy, dep habarlaidy "Ult aqparat".
Atqarylyp jatqan jumystar týraly Premer-Ministrdiń Birinshi orynbasary – qarjy ministri Á. Smaiylov, ulttyq ekonomika ministri R. Dálenov, energetika ministri N. Noǵaev, syrtqy ister ministri M. Tileýberdi, saýda jáne integratsiia ministri B. Sultanov, aýyl sharýashylyǵy ministri S. Omarov, bilim jáne ǵylym ministri A. Aimaǵambetov, mádeniet jáne sport ministri A. Raiymqulova baiandady.
Paidalanylmaityn aýyl sharýashylyǵy jerlerin olardy alý tetikterin kúsheite otyryp, óndiristik qyzmetke tartý jumystaryn jandandyrý, aýyldyq jerlerde turatyn, sondai-aq az qamtylǵan jáne kóp balaly otbasylardan shyqqan daryndy balalardy anyqtaý júiesin engizý, dene shynyqtyrý men buqaralyq sportty damytý, balalar úshin sport infraqurylymyn qoljetimdi etý jónindegi sharalar, sondai-aq Dene shynyqtyrý jáne buqaralyq sportty damytý jónindegi 2020-2025 jyldarǵa arnalǵan keshendi jospardyń jobasy qaraldy.
Úkimet basshysy Ult jospary men QR Prezidentiniń 2019 jylǵy 2 qyrkúiektegi Joldaýyn tolyq jáne sapaly iske asyrý boiynsha belsendi jumystardy jalǵastyrýdy tapsyrdy.
Birinshi kezekte ekonomikanyń basymdyqty sektorlaryndaǵy jańa iri jobalarǵa investitsiia tartý kólemin arttyrý, investitsiialyq ahýaldy jetildirý, memlekettik basqarý reformasyn júrgizý, salyq júiesin jańǵyrtý jáne t. b. boiynsha tarmaqtarǵa erekshe nazar aýdaryldy.
«Jalpy, basymdyqty salalarda jańa jobalardy qurý úshin zákirli investorlardy tartý boiynsha jumysty jandandyrý qajet», — dedi A. Mamin.
