Ulttyq jobalar jalpyulttyq basymdyqtardy, Ulttyq damý josparyn jáne Ulttyq qaýipsizdik strategiiasyn iske asyrý úshin ázirlendi. Bul týraly Úkimet otyrysynda QR Premer-Ministri Asqar Mamin aitty, dep habarlaidy QazAqparat.
«Memleket basshysy Qasym-Jomart Kemeluly Toqaev 2020 jylǵy 1 qyrkúiektegi Qazaqstan halqyna Joldaýynda memlekettik baǵdarlamalardan ulttyq jobalarǵa kóshý týraly tapsyrma berdi. Búgin biz ulttyq jobalardy qaradyq, olardy 2021 jylǵy 24 qyrkúiekte Reformalar jónindegi joǵarǵy keńeste Memleket basshysy maquldaǵan bolatyn. Ulttyq jobalar Jalpyulttyq basymdyqtardy, Ulttyq damý josparyn jáne Ulttyq qaýipsizdik strategiiasyn iske asyrý úshin ázirlendi. Ulttyq jobalarda kózdelgen is-sharalar Memleket basshysynyń tapsyrmalary men «Nur Otan» partiiasynyń sailaýaldy baǵdarlamasyndaǵy mindetterge tolyǵymen sáikes keledi», - dedi Asqar Mamin.
Ulttyq jobalardyń basymdyqty mindetteri - ekonomikanyń turaqtylyǵy men onyń básekege qabilettiligin odan ári kúsheitý, halyqtyń ómir súrý sapasyn jaqsartý boiynsha mańyzdy mindetterdi sheshý.
«Mindetterdi iske asyrý úshin ulttyq jobalardy biýdjet qarajaty men jeke investitsiialar esebinen basym qarjylandyrý kózdelgen», - dedi Premer-Ministr.
Otyrys barysynda tiisti Úkimet qaýlylaryna daýys berilip, bekitildi.
Budan buryn habarlanǵandai, Ulttyq ekonomika ministri Áset Erǵaliev úsh ulttyq jobany tanystyrdy.
Qazaqstan Respýblikasy Prezidenti janyndaǵy Reformalar jónindegi joǵary keńestiń tapsyrmasyn oryndaý maqsatynda, Ulttyq ekonomika ministrligi múddeli memlekettik organdarmen birlesip úsh Ulttyq jobany ázirledi. Olar «Qazaqstandyqtardyń ál-aýqatyn arttyrýǵa baǵyttalǵan turaqty ekonomikalyq ósý» jáne «Kásipkerlikti damytý», sonymen birge «Qýatty óńirler – el damýynyń draiveri» atty ulttyq jobalar.
Sonymen qatar, Aýyl sharýashylyǵy ministri Erbol Qarashókeev Agroónerkásiptik keshendi damytýdyń 2021-2025 jyldarǵa arnalǵan ulttyq jobasy jaiynda baiandady.
