QR Premer-Ministri Asqar Mamin Nur-Sultan qalasynda Ulttyq biotehnologiia ortalyǵyna bardy, onda qazaqstandyq ǵylymnyń damýymen, ǵylymi-tehnikalyq baǵdarlamalar men qoldanbaly jobalardy ázirleýmen tanysty, dep hbarlaidy "Ult aqparat".
QR Úkimetiniń basshysy ortalyqtyń meditsina, aýyl sharýashylyǵy, ekologiialyq biotehnologiia, azyq-túlik jáne óńdeý ónerkásibi salalaryndaǵy perspektivalyq ázirlemeleri, sondai-aq, olardy elimizdiń ekonomikasyna odan ári engizý múmkindikteri usynylǵan zerthanalyq blokty tekserdi.
Elordalyq biotehnologiia ortalyǵynda túrli baǵyttaǵy 14 zerthana ornalasqan, onda genetikalyq injeneriia, immýnologiia, baǵanalyq jasýshalar, adam ulpalaryn qalpyna keltirý, ekologiialyq biotehnologiia, farmakologiia salasynda zertteýler júrgiziledi.
Ulttyq biotehnologiia ortalyǵynyń bas direktory E. Ramanqulov ortalyq mamandary birqatar mańyzdy ǵylymi-zertteý jobalaryn ázirlegenin aitty.
Nysandy aralaý barysynda baǵanalyq jasýsha zerthanasynyń meńgerýshisi V. Ogai, ujymdyq paidalaný zerthanasynyń meńgerýshisi E. Joldybaeva, ósimdikterdiń genetikalyq injeneriiasy zerthanasynyń meńgerýshisi Sh. Manabaeva, adam genetikasy zerthanasynyń meńgerýshisi M. Jabaǵin adam genomikasy, genetikasy jáne onyń patogenderi, úi janýarlarynyń genetikasy, sondai-aq, ǵylymnyń jańa salasy — genomdyq redaktsiialaý salasynda júrgizilgen zertteýlerdiń nátijelerimen tanystyrdy. Olardyń arasynda — deneniń kúigen jerlerin emdeitin jasýshalyq preparattar, bidai men kartoptyń jańa suryptary, aýrýlarǵa qarsy vaktsinalar, dári-dármekter, dárilik jáne emdeý-profilaktikalyq preparattar bar.
QR Premer-Ministri Asqar Mamin ortalyqty qaraý qorytyndysy boiynsha qoldanbaly jobalardy ázirleýdi jalǵastyrýdy jáne ǵylymi nátijelerdi kommertsiialandyrý sharalaryn kúsheitýdi tapsyrdy. Bilikti mamandardy daiarlaýǵa erekshe nazar aýdarý qajet.
