Qazaqstan Respýblikasynyń Premer-Ministri Asqar Mamin jumys saparymen Resei Federatsiiasyna bardy, dep habarlaidy "Ult aqparat" Premer-Ministrdiń baspasóz qyzmetine silteme jasap.
Tatarstanda Asqar Mamin RF Úkimetiniń Tóraǵasy Dmitrii Medvedevpen kezdesti. Eki eldiń Premer-Ministrleri Qazaqstannyń Tuńǵysh Prezidenti – Elbasy Nursultan Nazarbaev pen Resei Prezidenti Vladimir Pýtin negizin salyp, damytqan strategiialyq áriptestik pen odaqtastyqtyń joǵary deńgeiin atap ótti. Taraptar biyl sáýir aiynda QR Prezidenti Qasym-Jomart Toqaevtyń Reseige resmi sapary aiasynda qol jetkizilgen kelisimderdi iske asyrý barysyn talqylady.
Úkimetaralyq kelicsózder saýda-ekonomikalyq, investitsiialyq yntymaqtastyqty, ónerkásiptik kooperatsiiany odan ári arttyrýǵa, energetika, aýyl sharýashylyǵy, kólik salalaryndaǵy ózara is-qimyl máselelerine arnaldy. Kezdesýde sonymen qatar shekara mańy jáne integratsiialyq yntymaqtastyqtyń ózekti máseleleri qaraldy.
Resei — Qazaqstannyń basty saýda seriktesi. Ótken jyly eki jaqty saýda kólemi 13%-ǵa artyp, $18,5 mlrd-qa jetti. 2019 jylǵy jarty jyldyqtyń qorytyndysy boiynsha taýar ainalymy $8,8 mlrd qurady.
«Jetkiziletin taýarlar men qyzmetterdiń nomenklatýrasyn keńeitý, bizdiń biznes-qaýymdastyqtar arasynda tikelei bailanys ornatý, sondai-aq, úshinshi elder naryqtaryna taýarlardy ilgeriletý boiynsha birlesken jumystardy jalǵastyrý qajet», — dep Asqar Mamin, reseilik naryqqa 60-tan astam pozitsiia boiynsha qazaqstandyq taýarlardy jetkizýdiń joǵary áleýetin atap ótti.
Qazaqstandyq-reseilik yntymaqtastyqtyń basty baǵyttarynyń biri — ónerkásiptik kooperatsiia.
Jumys sapary barysynda QR Premer-Ministri Tatarstannyń aldyńǵy qatarly ónerkásiptik kásiporyndaryn, atap aitqanda, «KAMAZ» JAQ-ty aralady.
QR jáne RF-tiń ónerkásiptik kooperatsiia salasyndaǵy Birlesken is-qimyl baǵdarlamasy aiasynda «Agromashholding KZ» qazaqstandyq kompaniiasy men «KAMAZ» birlesip birqatar jobalardy júzege asyrýda, onyń ishinde júk avtomobilderiniń beldikteriniń redýktorlaryn jáne arnaiy tehnika óndiretin zaýyt qurylysy bar.
Buǵan qosa, Asqar Mamin «Tatneft» kompaniialar tobyna kiretin «Taneko» munai óńdeý zaýytyna bardy. Tatarstan astanasynda QR Úkimetiniń basshysy Qazan tikushaq zaýytynda bolyp, «Himgrad» tehnopolisin aralady.
Qazanda Asqar Mamin «Wildberries» jetekshi reseilik halyqaralyq internet dúkeniniń bas direktory Tatiana Bakalchýkpen kezdesý ótkizdi, onda kompaniianyń Qazaqstanda saýda-logistikalyq ortalyqtardy salý jáne biznesti keńeitý jónindegi josparlary talqylandy.
Kelissózderdiń qorytyndysy boiynsha «Astana» halyqaralyq qarjy ortalyǵy men «Wildberries» kompaniiasy arasynda Ózara túsinistik týraly memorandýmǵa qol qoiyldy, sondai-aq, AHQO qatysýshysy retinde «Wildberries» tirkelý týraly sertifikat berildi.
Jumys sapary aiasynda Qazaqstan Premer-Ministri Asqar Mamin Resei Úkimetiniń basshysy Dmitrii Medvedevpen birge «WORLDSKILLS KAZAN 2019» chempionatynyń ashylý saltanatyna qatysty. Chempionat qarsańynda Asqar Mamin WorldSkills standarttary boiynsha kásibi sheberlikten Qazaqstannyń ulttyq quramasymen kezdesip, olarǵa jarystarda sáttilik tiledi.
